Avropadan avtomobil idxalı arta bilər - Bunun üçün 2-3 rüb...

Avronun ucuzlaşması avzona ölkələrindən idxalın daha əlverişli qiymətə başa gəlməsinə imkan yaradıb. Bu səbəbdən Avropadan bəzi bahalı malların, o cümlədən avtomobillərin idxalına maraq artıb. Qeyd edək ki, Azərbaycan yük və minik avtomobillərinin önəmli hissəsini əvvəllər də Avropadan idxal edirdi. 2021-ci ilin məlumatına əsasən, idxal edilən 5 552 ədəd yük avtomobilinin 4200 ədəddən çoxu, minik avtomobillərinin isə təxminən dörddən biri avrozona ölkələrindən alınıb. 

Bəs, son aylarda avronun daha da ucuzlaşması avtomobil idxalını bir qədər də stimullaşdıra bilərmi?

Sfera.az saytına danışan nəqliyyat sahəsi üzrə ekspert Eldəniz Cəfər avronun ucuzlaşmasının Avropadan avtomobil idxalını əlverişli etdiyini bildirib. Lakin o, bunun üçün aşağı məzənnənin uzun müddət qalmasının vacib olduğunu da bildirdi:

“Avronun manata nəzərən məzənnə dəyərinin aşağı düşməsi Avropa regionundan idxal edilən avtomobillərin manatla ifadə edilən dəyərini ucuzlaşdırır. Amma məzənnə enməsinin daha əlverişli nəticələr verməsi, Avropa avtomobillərinin hissedilən qədər ucuzlaşması üçün avronun kursunun ən azı 2-3 rüb aşağı səviyyədə qalması lazımdır. Avronun manata nisbətən qısa müddət ucuz qalması Avropa avtomobillərinin dəyərində ciddi fərq yaratmır”.

Vasif,
Sfera.az