Taksilərdə kamera – Türkiyə təcrübəsi ölkəmizdə tətbiq edilə bilərmi?
Türkiyədə taksilərlə bağlı yenilik edilib. Belə ki, taksilərin salonunda kamera yerləşdirilməsi qanunla məcburi hal alıb. Bununla da sürücü və sərnişinlər arasında yaşanan neqativ halların qarşının alınması hədəflənir.
Ölkəmizdə də taksilərdə sərnişin-sürücü münasibətləri son zamanlar geniş müzakirələrə səbəb olur. Sərnişinlər taksi sürücülərinin davranışlarından, etinadsızlıqlarından və xidmət keyfiyyətindən narazı olduğu kimi, sürücülər də sərnişinlərin kaprizləri və s. hallardan narazıdır.
Maraqlıdır, bənzər qanun Azərbaycanda da qəbul edilə bilərmi?
Mövzu ilə bağlı Sfera.az-a açıqlama verən "Polisə dəstək" İctimai Birliyinin sədri Şəmsəddin Əliyev deyib ki, Türkiyədə tədbiq ediləcək bu sistem normaldır və heç bir mənfi tərəfi yoxdur.
“İlk növbədə sürücülərin mədəni səviyyəsini artırmaq üçün çalışmaq lazımdır. Görürük ki, bir çox hallarda sürücülərin artıq pul qazanmaq istəyi onların mədəni, etik davranışlarını üstələyir. Halbuki sürücülərin bir əxlaq kodeksi olmalıdır. Taksilərdə ümumən problemlər ona gərə baş verir ki, Azərbaycanda rəsmi şəkildə fəaliyyət göstərən taksi şirkətləri yoxdur. Yəni maddi vəziyyəti bir az yaxşı olan şəxs ölkəyə 50-60 maşın gətirib icarəyə verir və beləcə problemli taksi xidməti ortaya çıxır.
Hesab edirəm ki, ölkədə rəsmi taksi şirkətləri olmalıdır. Hətta həmin şirkətlər konkret dövlət qurumuna tabe edilməlidir. O ki qaldı, Türkiyədə qəbul edilən qanuna deyə bilərəm ki, Türkiyə kifayət qədər köklü bir ölkədir. Bənzər təkliflər Türkiyədə qəbul olunduqdan sonra bizdə də tədbiq edilir. Hesab edirəm, taksilərdə kameraların olması taksi sürücüləri ilə bağlı üzləşilən neqativ halların da qarşısını ala bilər”.
Turan Rzayev
