Azərbaycan əhalisinin yaş qrupları üzrə cins bölgüsü açıqlanıb.

Sfera.az rəsmi statistikaya istinadən xəbər verir ki, gənc əhalinin əsas hissəsini kişilər, yuxarı yaş qruplarında olan insanların daha çox hissəsini qadınlar təşkil edir.

Kişilərin say baxımdan nisbi üstünlüyü 25-29 yaş qrupuna qədərdir. Yuxarı yaş qruplarında isə say üstünlüyü qadınlara məxsusdur.

25-29 yaş qrupunadək kişilərin sayının qadınlara nisbətən üstünlük təşkil etməsi, oğlan uşaqlarının daha çox doğulması ilə izah olunur. Lakin kişilər arasında ölüm səviyyəsinin daha yüksək olması 30 və yuxarı yaşda olan qadınların sayının kişilərə qarşı artmasına səbəb olur.

Ümumilikdə, son illərdə kişilərin sayında daha çox artım müşahidə olunur. Bunun hesabına Azərbaycan əhalisində qadın və kişi sayı arasındakı fərq kiçilir. 2022-ci ilin yanvarın 1-nə olan məlumata əsasən, əhalinin sayı 10,156 milyon nəfər olub ki, bunun da 5,082 milyonu qadın, 5,075 milyon nəfəri kişidir.

Əvvəlki illərdə fərq daha böyük idi. Məsələn, 1990-cı ildə qadınların sayı kişilərdən 170 min nəfər çox, 2000-ci ildə 170 min nəfər çox, 2010-cu ildə 77 min nəfər çox olduğu halda 2021-ci ildə 7 min nəfər çox olub. Dinamika göstərir ki, 2023 və ya 2024-cü ildə kişilərin sayı qadınlardan daha çox olacaq.

Onu da əlavə edək ki, XX əsrin birinci yarısında ölkədə kişilərin sayı qadınlara nisbətən çox olub.

Lakin baş vermiş repressiya və İkinci Dünya müharibəsi illərində kişilərin çoxsaylı tələfatı nəticəsində əsrin ikinci yarısından bu göstərici qadınlar arasında üstünlük təşkil edir.

Vasif,
Sfera.az

Azərbaycanda kişilərin sayı qadınların sayını ÖTƏCƏK - STATİSTİKA