Qida Təhlükəsizliyi Agentliyi (AQTA) qida təhlükəsizliyinin təmin edilməsi, istehlakçı hüquqlarının müdafiəsi sahəsində tədbirləri davam etdirir. Nəzarət tədbirləri çərçivəsində satış şəbəkələrində istehlakçılara təqdim olunan bir sıra içkilərin enerji içkisi olub-olmaması, eləcə də qaydalara uyğunluğunun müəyyən edilməsi üçün monitorinqlər həyata keçirilib.

Bu məqsədlə ölkəmizdə istehsal olunan, eləcə də idxal edilən enerji içkilərindən və bir sıra içkilərdən nümunələr götürülərək laborator müayinələr aparılıb. Monitorinqlər çərçivəsində bir çox içkilərin enerji içkisi olub-olmaması araşdırılıb.

Maraqlıdır, adları çəkilən içkilər bundan sonra necə adlanacaq? Ümumiyyətlə AQTA-nın belə bir monitorinq keçirməsinə səbəb nə olub?

Mövzu ilə bağlı Sfera.az-a açıqlama verən Azad İstehlakçılar Birliyinin (AİB) sədri Eyyub Hüseynov deyib ki, mən hər zaman insanların enerji içkilərini istehlak etməməsinin tərəfdarı olmuşam:

“Azad İstehlakçılar Birliyi olaraq biz daim enerji içkilərinə əlçatanlığın azaldılması işini aparmışıq. Dövlət orqanları da bu sahədə bizə kömək edib. Bu sahədə vergilərin artırılması buna misal ola bilər.  Qida Təhlükəsizliyi Agentliyində ictimai şuranın üzvü olaraq tək enerji içkiləri deyil, bu kimi digər məhsulların istehlakına qarşıyam. Üzərində yazılan ilə tərkibi arasında fərq olan bu kimi məhsullar çoxdur. Misal üçün, əhalinin çox istifadə etdiyi kolbasa məhsullarında da bənzər hallar var”.

E. Hüseynovun sözlərinə görə, əgər enerji içkisinə qabının üzərində qeyd edilən maddələrdən az vurulubsa yəni suya daha çox bənzəyirsə AQTA sakit durmalıdır:

“AQTA-nın yerinə olsam, sakit durardım. Arzu edərdim ki, istehlakçılar aldadılsın, enerji içkisi yox, elə su içsinlər. Çünki onların su içməsi enerji içməsindən daha faydalıdır. AQTA həm də onu bilməlidir ki̇, "Coca-Cola", "Pepsi", "Fanta" da ən az enerji içkiləri kimi zərərlidir. Təklif edirəm ki, bu məhsullar üzrə də bənzər monitorinqlər keçirilsin. O ki qaldı AQTA-nın belə bir monitorinq keçirməsinə, deyə bilərəm ki, qurum hər zaman belə monitorinqlər keçirib. Mən bunu alqışlayıram”.

Turan Rzayev