2022-ci ilin iyulun 28-də Azərbaycan Respublikasının Gənclər Fondunun dəstəyi və Azərbaycanlı Tələbələr və Məzunlar Platformasının (ASAP) təşkilatçılığı ilə “ASAP Forum 2022” tədbiri keçirilib.

Tədbirdə Qarabağ Dirçəliş Fondunun İdarə Heyətinin sədri Rəhman Hacıyev məruzəçi qismində çıxış edib.

Sfera.az xəbər verir ki, R.Hacıyev məruzəsi zamanı xaricdə təhsil alan və məzun olmuş azərbaycanlı gənclərə Qarabağ Dirçəliş Fondunun yaradılması, əsas məqsəd və vəzifələri, missiyası, prioritetləri barədə ətraflı məlumat verib və Ali Baş Komandanın rəhbərliyi ilə müzəffər Azərbaycan ordusunun qazandığı tarixi qələbədən sonra regionumuzda yaranan yeni reallıq haqqında da fikirlərini bölüşüb.

Bundan sonra işğaldan azad edilən ərazilərdə erməni terroru nəticəsində maddi obyektlərə, memarlıq inciləri olan tarixi abidələrə, ekologiyaya dəyən zərər haqqında R.Hacıyev ətraflı məlumat verib.

O, zərərin aradan qaldırılmasında dövlət, biznes və cəmiyyətin səylərinin birləşdirilməsinin, işğaldan azad edilən ərazilərin bərpası və yenidən qurulmasında həmrəyliyin rolunu xüsusi vurğulayıb. Yeni dövrün inkişafının əsas iştirakçısına çevrilən gənclərin, birlik nümayiş etdirərək Qarabağın bərpası və yenidən qurulması istiqamətində görülən işlərə dəstək göstərməsinin önəmli olduğunu deyən Fondun rəhbəri qeyd edib ki, xarici təhsil müəssisələrinin 300 nəfər azərbaycanlı tələbə və məzununun iştirakı ilə “ASAP Forum 2022” adlı forumda müxtəlif mövzularda panel müzakirələri, karyera sərgisi, şəbəkələşmə tədbirləri, müvafiq sahələr üzrə ixtisaslaşmış ekspertlər tərəfindən TEDx formatında çıxışlar və beynəlxalq müstəvidə təmsilçiliklə bağlı müzakirələr aparılacaq.