Bu gün STP Şirkətlər Qrupu media nümayəndələri üçün istehsalat turu təşkil edib.

Sfera.az bildirir ki, Azərbaycanın 17 aparıcı media qurumundan 30-a yaxın jurnalistin iştirak etdiyi tur zamanı şirkətlər qrupuna daxil olan “STP Global Cable”ın istehsal etdiyi dizel generatorlarının təqdimatı baş tutub. Media üçün istehsal turunda ilk öncə jurnalistlərə SƏTƏM təlimi keçirilib. Daha sonra kabel və dizel generatorlarının istehsalı həyata keçirilən elektrik avadanlıqları istehsalı sahəsi ilə tanışlıq olub. Jurnalistlər ilk olaraq, ümumi istehsalat, daha sonra isə yeni məhsul olan dizel generatorlarının istehsalı prosesini yaxından izləyiblər. Detalların hazırlanmasından avadanlığın hazır məhsul formasına gətirildiyi yığım sahəsinə qədər hər bir detal barədə məlumat verilib.

Qeyd olunub ki, müəssisədə güc diapazonu 15KVA-2000KKVA güc diapazonunda dəyişən dizel generatorlarının istehsalı planlaşdırılır. Şirkət ilkin olaraq, iki model, 27.5 KVA və 55KVA dizel generatorlarını istehsal edib. Məlumata görə, yaxın gələcəkdə modellərin sayı artırılacaq. İstehsal olunan hər generatorun çıxış gərginliyi 220-400 volt aralığındadır. Həmçinin media nümayəndələri üçün ümumi təqdimat keçirilib. Tədbirin sonunda jurnalistlərə hədiyyələr təqdim edilib.

Xatırladaq ki, Azərbaycanda daha öncə dizel generatorlarının istehsalı həyata keçirilməyib və STP-nin istehsalı ölkə üçün ilkdir.