"Formula 1" oyunları ilə əlaqədar bəzi yollarda hərəkətin məhdudlaşdırması əlavə problemlər yaradıb. 

Sfera.az bildirir ki, bu barədə sosial şəbəkədə paylaşım edənlərdən biri də Bakı sakini Orxan Məmmədli olub. O, yaşadığı ünvanın hər iki girişinin bağlandığını deyib.
Adıçəkilən şəxs "Facebook" hesabındakı paylaşımında mövcud durumla bağlı Bakı Şəhər Halqasını günahlandırıb. Sözügedən paylaşımı təqdim edirik:

“Yaşadığım binanın iki giriş-çıxışı var, ikisini də  1 və 2 nömrəli qırmızı halqalar bağlayıblar. 1-ci aydındır, xəritədə var, amma 2 kiminsə keyfinin məhsuludur. İndi sual yaranır: mən evə necə gedim? 1 nömrəli nöqtədən bizim binanın döngəsinə 8-10 metr məsafə var, amma "Baku City Circuit"in əməkdaşları işlərinə çox məsuliyyət və xüsusi qəddarlıqla yanaşırlar deyə bu variant nəzərə alınmır. Deyəcəksiniz ki, bəs müraciət et və buraxılış al, bax bu çox qəliz məsələdir. Deməli, əvvəl "Baku City Circuit"in veb səhifəsində yerləşdirilmiş nömrəyə zəng edirsiniz, sizə deyirlər ki, bəs buraxılışları təqdim edən xanım gedib stiker gətirməyə, 2 saat sonra növbəti zəng və xanım hələ qayıtmayıb. Sizə tövsiyyə edirlər ki, növbəti gün səhər 10:30-11:00-da zəng edəsiniz, zəng edirsiniz, deyirlər ki xanım saat 12-də gələcək.

Gedirsiniz Mənzil Kommunal İstismar İdarəsinə (MKİİ), görürsünüz ki, 25-30 nəfər o xanımı gözləyir, xanım isə hardadır, bəli, gedib stiker gətirməyə. 25-30 dəqiqə gözləyib digər işlərinizi həll etməyə gedirsiniz. Sonra zəng edirsiniz "Baku City Circuit"in müştəri xidmətinə ki, daha dəqiq məlumat alasınız, çünki sizin bu stikeri gözləməkdən başqa da işləriniz var, orda isə sizə deyirlər ki, xanım MKİİ-də işinin başındadır, tez qayıdırsınız həmin MKİİ-yə, xanım isə hələ stiker götürməkdən qayıtmayıb. Sonra müştəri xidmətindəki xanım izah edir ki, səbrlə gözləsəniz, bu gün müraciət edə bilərsiniz, müraciətiniz qəbul olunsa, ən az 2 gündən sonra stikerinizi təhvil ala biləcəksiniz. Qısası ən az 4 gün…. Suallar yaranır - Niyə belə qeyri-peşəkar təşkil edirlər? Niyə insanları incidirlər? Hə, bir də yol polisinin o bağlanmış məntəqələrdəki rolu nədir, çünki onlar deyir ki, biz baxmırıq, səlahiyyət "Baku City Circuit"in əməkdaşlarındadır (bundan əvvəlki Formulada belə deyildi)?”, - paylaşımda qeyd olunub.

İnci
Sfera.az