Dünya Kubokunun 7-ci günü: Məğlub tailandlı qızlar qalib ukraynalıların bayrağı rəngində bant taxdılar - FOTO/YENİLƏNİB
Bugünkü yarışlarda bürünc medal ukraynalılara 25 metr məsafəyə tapançadan sürətli atəşaçma üzrə kişilər arasında yarışdan gəlib.
Bu yarışın qızıl medalına isə Fransa idmançısı Jan Kikampua sahiblənib. Bakı Atıcılıq Mərkəzində yarışları izləyən Milli Olimpiya Komitəsinin vitse-prezidenti Çingiz Hüseynzadə Avropa çempionatı, dünya çempionatı yarışlarının Azərbaycanda keçirilməsini arzuladığını bildirib.
“Bakı Atıcılıq Mərkəzində 4 məktəb fəaliyyət göstərir. Həmin uşaqları bura cəlb etmək lazımdır. Ümumiyyətlə, idmanın bu növünü kütləviləşdirmək əsas məqsəd olmalıdır” – deyən MOK vitse-prezidenti bu idmanın hər növündə güclü idmançılarımız olduğunu vurğulayıb. “Biz də Milli Olimpiya Komitəsi olaraq federasiyanı gördüyü işlərdə tam dəstəkləyirik” - Milli Olimpiya Komitəsinin vitse-prezidenti Çingiz Hüseynzadə əlavə edib.
***
13:37
Bakıda atıcılıq üzrə davam edən Dünya Kuboku geniş auditoriya qazanıb. Təkcə Beynəlxalq Atıcılıq İdman Federasiyasının saytındakı canlı yayımın ötən 1 həftədə 80 min izləməsi olub. Bundan əlavə, yarışlar peyk vasitəsilə dünyanın bir sıra ölkələrinin telekanallarında canlı yayımlanır.
Sfera.az xəbər verir ki, iyunun 4-də 25 metr məsafəyə tapançadan atəş üzrə qadınlar arasında komanda yarışında Ukrayna komandası tailandlıları 17:11 hesabı ilə məğlub edərək qızıl medal qazanıb. Final yarışına Ukraynanın bayrağı rənglərində bantla çıxan tailandlı qızların hərəkəti isə hər kəsi kövrəldib.
“Bakıda Ukraynanın himnini eşitmək hər nə qədər olsa da, mənim üçün bir o qədər ağır idi. Dövlətimin himni çalınanda vətənimdə yaşananlar gözlərimin qarşısına gəlir və qəribə hisslər keçirirəm. Ən böyük arzum qələbə qazanıb himnimizin səslənməsinə nail olmaq idi. Azərbaycan xalqının Ukraynaya verdiyi dəstək bizim üçün çox önəmlidir. Ukraynaya indi çox ağırdır, çox” – ukraynalı Oksana Kovalçuk deyib.
Bu gün Ukrayna komandası növbəti medalını 50 metr məsafəyə tüfəngdən atəş üzrə qarışıq komanda yarışında qazanıb: hindistanlılara uduzan Ukrayna komandası gümüş medala sahib olub.
Yarışlar davam edir.
