Yeni rabitə naziri Fərhad Əliyevin "kirli əli"ni niyə aparat rəhbəri qoydu? - Şok təfərrüat
Əli Abbasovun vəzifədən alınmasından sonra Rabitə və Yüksək Texnologiyalar Nazirliyinin rəhbərliyinə
gətirilən nazir Ramin Quluzadənin atdığı addımlar hələ də peşəkar rabitəçilər arasında ziddiyyətli qarşılanır.
Savash.org xəbər verir ki, bu barədə "Reytinq” qəzetinin son sayında da maraqlı araşdırma dərc olunub.
Yeni nazirin gəlişindən dərhal sonra Əli Abbasovun köməkçiləri ilə yanaşı, nazirlikdəki ən yaxın kadrlarını
təmizləməsi anlaşılan olsa da, ötən 3 ayda onun nələri planlaşdırdığı, hansı mütərəqqi addımlar atdığı, hansı
islahatlar apardığı hələki hiss olunmur:
"Yeni nazir ancaq və ancaq sabiq nazir Misir Mərdanovun nazirlikdə aparat rəhbərinin müavini olan qardaşı
İlham Mərdanovu və bir neçə tanınan vəzifəli şəxsləri "vurmaq”la yanaşı, Beytulla Hüseynovun həbsindən
sonra Bakı Telefon Rabitəsi İstehsalat Birliyinə (BTRİB) direktor əvəzi və direktor təyinatları ilə medianın
gündəmində olub. Bir də bu yaxınlarda rəsini işdən azad edib, yeni rəis təyinatı həyata keçirdiyi Lənkəranda
vətəndaşlarla qəbul keçirib ki, orada da kimləri qəbul etməsi yayılan foto və videolardan bəllidir...
Maraqlıdır ki, yeni nazirdən ötən üç ayda daha ciddi islahat və dəyişikliklər gözlənilsə də, o, bunların heç birini
edə bilmədi. Nazirin yaxın çevrəsinə daxil olanlar isə bunu Baş Prokuror yanında Korrupsiyaya Qarşı Mübarizə
İdarəsinin rabitə sektoruna daxil olan bütün müəssisələrdə apardıqları kompleks yoxlama ilə əlaqələndirməyə
çalışırlar. Guya nazir Ramin Quluzadə prokurorluğun apardığı istintaqın nəticəsini gözləyir. Yəni bunların
məntiqiylə yanaşsaq, prokurorluq 1 il istintaq aparsa, Ramin Quluzadə də guya bunu gözləyəcək. Gülməlidir.
Ən azı ona görə ki, rabitə ölkənin ən strateji sahələrindən biri olmaqla, həm də dövlət müəssisəsidir. Ancaq sizə
dəqiq deyə bilərəm ki, əslində, bu, bir bəhanədir.
Sadəcə, ötən müddətdə Ramin Quluzadə hələ rabitə sektorunun əlifbasını öyrənməyə vaxt sərf edib, ancaq
və ancaq bu sahədəki kadrları öz aləmində saf-şürük etməklə məşğuldur. Bu "saf-çürük”lərin, apardığı bir neçə
kadr dəyişikliyinin rabitə sektorunda ciddi "çatlar”a, fəsadlara yol açdığı isə artıq açıq görünməyə başlayıb.
Bəli, onun iki ciddi kadr təyinatı - nazirlikdə aparat rəhbəri və BTRİB-ə baş direktor seçimləri daxildə baş
qaldıran ilkin etirazların cücərtilərini boy atdırmağa səbəb olub”.
Məlumatlı şəxs deyir ki, yeni nazirin köhnə kadrların əksəriyyəti ilə vidalaşıb, öz komandasını "yad kadrlar"dan formalaşdırmaq istəyi, nazirlikdə birmənalı qarşılanmayıb:
"Nədən ki, bu kadrlar rabitəyə yad olmaqla yanaşı, bu sahədən ümumiyyətlə, məlumatlı deyillər.
Məsələn, korrupsiya və müxtəlif cinayətlərdə iştirak ittihamı ilə həbs olunan Vidadi Zeynalovun yerinə ötən
həftə gətirilən əslən Cəlilabad rayonundan olan aparat rəhbəri Əli İzzət oğlu Abdullayevin təyinatını götürək.
Nazirin bu təyinatı nəinki rabitə sektorunda, hətta hakimiyyət dəhlizlərində ciddi narazılıq və şübhələrlə qarşılanıb.
Eyni sözləri az əvvəl BTRİB-ə rəsi təyin etdiyi Rövşən Babayev haqda da demək olar”.
Məlumatlı şəxs deyir ki, Ramin Quluzadə təyinatından bu yana keçirdiyi görüşlərdə daima şəffaflıq, işgüzarlıq və peşəkarlıqdan ağızdolusu danışsa da, əslində, özü kimi rabitəyə tamamiylə yad olan Əli Abdullayevi aparat rəhbəri
təyin etməsi, nazirlikdə onun təcürbəsizliyi, eyni zamanda, tayfabaz, qrupbaz olması ilə əlaqələndirilir:
"Xüsusən ona görə ki, yeni aparat rəhbəri Əli Abdullayev cəmiyyətdə, o cümlədən rabitə sektorunda yenilikçi, şəffaf,
bir sözlə, müsbət imicli kadr kimi tanınmır. Bununla bağlı mediada gedən məlumatlara istinad etsək, Əli Abdullayevin
adı irimiqyaslı maxinasiyalarda qırmızı xəttlə keçən bir başqa qurumda rəhbər vəzifə tutmuş şəxs kimi qabardılıb.
Üstəlik, indiki həssas məqamda Ramin Quluzadənin bu təyinatının arxasında çox gizli və şübhəli məqamların
dayandığına da işarə vurulub”.
Məlumatlı şəxs deyir ki, Əli Abdullayev Əmlak Məsələləri Dövlət Komitəsində Hüquq şöbəsinin müdiri, bundan
sonra isə Hərracların Təşkili üzrə Auksion Mərkəzinin baş direktoru vəzifələrində işləyib:
"O zaman hərracların necə keçirildiyini mübahisələndirməyə yəqin ki, ehtiyac yoxdur. İstənilən iş adamını danışdırsaq,
bunu izah edə bilər. Bu, Əli Abdullayevin adına yazılan ilk mənfi qiymətdir. Hələlik bununla da işimiz yoxdur.
Xüsusən yeni aparat rəhbərinin gənc yaşlarından ulduzunun hansı "meyar" əsasında parlamasına işıq salacaq
fakt varkən, cəmiyyətə kifayət qədər aydın olan hərrac prosesi ilə oxucuları yormayaq.
Gəlin razılaşaq ki, bu ölkədə diplomunu alandan dərhal sonra heç kim birdən-birə hansısa bir nazirlik və ya komitədə
birbaşa şöbə müdiri təyin edilmir. Bəs, Əli Abdullayevin ulduzu belə sürətlə necə parlaya bilərdi?! Axı, onun hansı
görünən xüsusi fitri istedadı vardı ki, birdən- birə önəmli postlara gətirildi? Onun o zamandan bu günə sürətli
yüksəlişində hansı "fövqəlqüvvə"nin təqdimatı rol oynayır?
Əlbəttə, bütün bunlar araşdırılası və cavabını gözləyən suallardır.
Hələlik aydın olan odur ki, Əli Abdullayevin daşınmaz əmlak sektorundan başlayan sürətli yüksəlişi o zaman hazırkı
Əmlak Məsələləri Dövlət Komitəsi üzərində dominatlıq edən sabiq iqtisadi inkişaf naziri Fərhad Əliyevin adı ilə hallanır.
Bu söhbətin meydana çıxması isə bir neçə faktorla əlaqələndirilir.
1-cisi, Əli Abdullayev Fərhad Əliyevin yerlisidir. O Əli Abdullayevin ki, atası İzzət Abdullayev Cəlilabadda tanınmış adam
olub. Ötən əsrin 70-ci illərində Cəlilabad Rayon İcraiyyə Komitəsinə rəhbərlik edib. Sonralar Biləsuvar və Cəlilabad rayonlarında suvarma idarələrinin rəisi, Meliorasiya və Su Təsərrüfatı Komitəsində məsul vəzifədə işləyib.
Respublikanın əməkdar mühəndisidir.
Onun Fərhad Əliyevlə xüsusi münasibətlərinin olduğu da sirr deyil. Fərhad Əliyevin yüksəlişində də bir yerli
kimi Əli Abdullayevin atasının ciddi dəstəyi olduğunun da iddia edildiyi məlumatda o da qeyd olunur ki, həmin
illər regional qruplaşmaya üstünlük verən Fərhad Əliyev bu və ya digər səbəblərdən onun oğlunu ali məktəbi
bitirən kimi yüksək vəzifəyə təyin edib.
Xatırladaq ki, Əmlak Məsələləri Dövlət Komitəsi 2001-ci ildə Dövlət Əmlakının İdarə Olunması və Özəlləşdirilməsi Departamenti kimi İqtisadi İnkişaf Nazirliyinin tərkibində fəaliyyət göstərib. Quruma o vaxt kadr təyinatları məhz
Fərhad Əliyev tərəfindən aparılıb. Bunu yəqin çoxluq xatırlayır. Yəni Əli Abdullayevin gənc yaşlarından dövlət
idarəçiliyində ulduzunun parlaması təsadüf olmayıb...”.
Məlumatlı şəxs deyir ki, Fərhad Əliyevin həbsindən sonra Əli Abdullayevin vəzifədə saxlanılmasının özəl səbəbləri
ilə yanaşı, onun aparat rəhbəri təyin olunadək haralarda, kimlərlə, hansı qruplarla sıx işbirliyində olması ilə bağlı
da çox ciddi ittiham dolu faktlar var.
Bizi məlumatlandıran mənbə bu faktları bölüşsə də, dəqiqləşdirilməsinə ehtiyac olduğunu deyir və əlavə edir ki,
Ramin Quluzadə Əli Abdullayevlə birlikdə rabitə sektorunu tam "cəngi”nə almaq, əsl planını həyata keçirmək istəyir:
"Ramin Quluzadə belə hesab edir ki, Əli Abdullayevdən peşəkar idarəçiyə bu ölkədə az-az təsadüf oluna bilər.
Daha dəqiqi, hələlik o, yeni aparat rəhbərini belə təqdim edir. Bəli, nazir Ramin Quluzadə yeni aparat rəhbəri,
BTRİB-ə kənardan gətirdiyi yeni baş direktor Rövşən Babayev, həmçinin "Azərpoçt”ın baş direktorunu əvəz edən
baş nazirin müavini Əli Əhmədovun bacısı oğlu Sübhan Kazımovun başının üzərinə qoyduğu nəzarətçilər və digər
kənar "kruq”u ilə rabitəni özününküləşdirməyi planlayıb. Bu məqsədinə çatmaq, daha dəqiqi, o, planını asanlaşdırmaq
üçün özü də bütün müəssisələrdə yoxlama apartdırır. Bununla bütün rəislərə ilk həftədən işlərində dönüş yaratmaq
üçün vaxt qoyduğunu, guya işlərinə baxıb, postlarında qalıb-qalmayacağına qərar verəcəyi haqda dediklərinə hüquqi
zəmin hazırlayır.
Ancaq hamı bilir ki, yeni nazir son üç aydır ancaq və ancaq özünün yerini möhkəmlətmək və sələfləri - Əli Abbasovla
Nadir Əhmədovun dövrlərindən qalan kök atmış rəislərə qarşı hücuma keçmək üçün "tədarük" görür. Yəni yoxlama aparmaqla, həmin rəisləri fakt qarşısında qoyub, ya vəzifələrindən rahatlıqla getmələrinə, ya da özüylə rahat
hesablaşdırmaq məqsədi güdülür.
Mənim bildiyimə görə, o, Bakının iki qovşaq rəisi istisna olmaqla, qalanlarını da BTRİB-in həbs olunan baş direktoru
Beytulla Hüseynovun kirvəsi Fətulla Seyidovun dalıycan göndərəcək.
Ramin Quluzadə eyni halı rayonlar üzrə də tətbiq etməyə hazırlıq görür. Artıq Abşeron qovşağında prokurorluğun
yoxlaması bitsə də, Ramin Quluzadənin kimlərdən ibarət olduğu maraqla araşdırılan yoxlama heyəti hələ də orada
"eşələnir”.
Bu da o deməkdir ki, Ramin Quluzadə yaxın həftələrdə Abşeron Telekommunikasiya Qovşağının rəisi Əyyub
İsmayılovla da yolları ayırmağı hədəfləyib. Ancaq onu da deyim ki, Əyyub İsmayılovla baş-başa gəlmək nazirə
gələcəkdə sıxıntı da yarada bilər. Çünki o, Prezident Administrasiyasının şikayətlər şobəsinin müdiri Süleyman
İsmayılovun əmisi oğlundur. Bu məqamı nəzərə alan bəziləri deyir ki, nazir bunu nəzərə alaraq, yoxlamanın
nəticəsinə uyğun şəkildə Əyyub İsmayılova başqa vəzifə verə bilər. Yox, əgər Ə.İsmayılovun qanunsuzluqları kompromatlaşdırılarsa və o, nazirə müqavimət götərmək cəcarəti göstərərsə, plan əksinə dəyişəcək. Yəni, o da
rabitədən uzaqlaşdırılacaq.
Onu da qeyd edim ki, hazırda bütün qovşaqlar da oxşar proseslər gedir. Sanki yeni nazir yoxlama ilə kimi vəzifədə
saxlayıb-saxlamayacağını müəyyənləşdirməklə bərabər, həm də vəzifədə saxlayacaqlarını əlinə aldığı
kompromatlarla özündən aslı vəziyyətə salmaq, daha dəqiqi, həmişə qorxu altında saxlamağı planlayır”.
ƏLİ ABBASOV və rabitənin həbsdə olan "AĞIRÇƏKİLİ TOPLARI"
Məlumatlı şəxsin sözlərinə görə, yeni nazirin BTRİB-dən fərqli olaraq, hələ də "Aztelekom” və "Azərpoçt”a
yeni rəhbər təyin edə bilməməsinin də özəl səbəbləri var...
Bundan başqa, Mia.az-ın əldə etdiyi məlumata görə, yeni nazirin sələfi Əli Abbasovun rabitə sektorunda olan
yaxın dostları, hətta yaxın qohumları haqda da Ramin Quluzadə hələ də tərəddüd keçirir: "Nazir, hətta Əli
Abbasovun bacısının həyat yoldaşının rəhbərlik etdiyi telekommunikasiya qovşağındakı yoxlamaya da ehtiyatlı
yanaşır. Onun sabiq nazirin qohumları və vaxtı ilə universitetdən gətirdiyi kadrlara münasibəti, eyni zamanda,
"Aztelekom", "Azərpoçt"la bağlı planları başqa bir mövzunun söhbətidir ki, bununla bağlı detalları zamanında
danışarıq...”.
Bu və ya digər məqamlarla bağlı araşdırmalarımız davam edəcək.
Qarşı tərəfin fikirlərini də dinləməyə hazırıq.
