Tələbə Qəbulu üzrə Dövlət Komissiyasının açıqladığı statistikaya əsasən, ötən il Azərbaycanda keçirilən buraxılış imtahanlarında oxuyub-yazmağı bilməyən yüzə yaxın məzun aşkar edilib.

Onlar 11-ci sinif şagirdləri arasında 24 nəfər, 9-cu sinif şagirdləri arasında isə 76 nəfərdir. 


Təhsil Nazirliyi həmin şəxslərin kimliyi və hansı bölgədə təhsil almaları ilə bağlı azvision.az-ın sorğusunu cavablandırıb.


Nazirlikdən verilən məlumatda bildirilib ki, Azərbaycan Dünya Bankının məlumatına əsasən ən yüksək savadlılıq səviyyəsinə malik olan ölkələrdəndir. Qeyd edilib ki, ölkədə əhalinin 99.79%-i oxuyub-yazma bacarığına malikdir. Əhalinin hər 10.000 nəfərindən 9979 nəfəri oxuyub-yazmağı bacarır. (Braziliyada bu rəqəm 91.48%, Türkiyədə 95.26%, Sinqapurda 96.54%, İspaniyada 98.08%, İtaliyada 99.07%-dir). 


Nazirlikdən onu da bildiriblər ki, son zamanlar mətbuatda yayılan bəzi xəbərlərdə IX sinifdə 76 nəfər şagirdin (108,563 nəfərdən), XI sinifdə isə cəmi 24 nəfərin (88,363 nəfərdən) oxuyub-yaza bilməməsi faciə şəklində qələmə verilir. Halbuki, bu o deməkdir ki, IX sinifi bitirən 108.563 nəfər şagirdin 108.487 nəfəri oxuyub-yazma bacarığına və eləcə də digər savadlılığa malikdir. XI sinfi bitirən şagirdlərdən isə 88.363 nəfərdən 88.339 nəfəri həm oxuyub-yazma bacarığına, həm də digər savadlılığa malikdir. Bu isə faiz olaraq 99.93% və 99.97% göstərici deməkdir. 


Təhsil Nazirliyindən, həmçinin bildirilib ki, oxuyub-yaza bilməyən şagirdlərin hansı rayonlardan olmasını, hansı məktəbi bitirmələrini, eləcə də onlardan neçə nəfərinin oğlan və ya qız olmasını aydınlaşdırmaq üçün TQDK-ya müraciət olunub. 


Qeyd edək ki, Azərbaycan əhalisinin rəsmi sayı ilə (9 milyon 696 min 800 nəfər) nazirliyin yaydığı bu göstəricini müqayisə edəndə, məlum olur ki, Azərbaycanda 20,363 nəfər yazıb-oxuya bilmir.