“Hər şey Paşinyanın istədiyi kimi olacaq” – Ermənistanda proseslər hansı məcrada inkişaf edəcək?

"Onik Qasparyan, Robert Köçəryan, Vazgen Manukyan və Serj Sarkisyana qarşı hərbi çevrilişə cəhd maddəsilə cinayət işi açılacaq”.

Bu sözləri Sfera.az-a açıqlamasında  Ermənistan prezidenti Armen Sarkisyanın baş qərargah rəisi Onik Qasparyanla bağlı yaşanan problemin həllini Konstitusiya Məhkəməsinin öhdəsinə buraxması fonunda sözügedən qurumun hansı qərarı verəcəyinə aydınlıq gətirərkən politoloq Məhəmməd Əsədullazadə deyib:

"Göründüyü kimi, Ermənistan prezidenti Armen Sarkisyan baş nazir Nikol Paşinyanın Baş Qərargah rəisi Onik Qasparyanı vəzifədən azad etməklə bağlı növbəti cəhdinə də etinasız  yanaşaraq, həmin sənədi imzalamadı və problemin həllini Konstitusiya Məhkəməsinin öhdəsinə buraxdı. Bu isə onu göstərir ki, Baş Qərargah, Prezident adminstrasiyası və müxalifət xalqın seçdiyi hökumətə qarşı birgə fəaliyyət göstərir və proses birbaşa Kremldən idarə olunur”.

Həmsöhbətimiz bildirdi ki, Ermənistan Konstitusiya Məhkəməsinin sədri Paşinyanın adamıdır: "Görünən odur ki, göndərilən ərizənin qəbulu və yaxud etirazla geri qaytarılması növbəti mərhələdə Ermənistanda siyasi prosesin hansı istiqamətdə gedəcəyinə stimul verəcək. Əslində, Konstitusiya Məhkəməsinin hansı qərar verməsindən asılı olmayaraq, Ermənistan qanunlarına görə artıq Baş nazirin sərəncamı qüvvəyə minib və Onik  Qasparyan Baş Qərargah rəisi vəzifəsindən azad edilib. Artıq proses ona doğru gedir”.

Politoloqun fikrincə, Ermənistanda proses artıq baş nazirin istəyinə uyğun cərəyan edir: "Martın 1-də Paşinyan tərəfdarlarının keçirdiyi kütləvi aksiya göstərdi ki, mövcud proses baş nazirin lehinə dəyişir. Ermənistan vətəndaşları ümumən hökumətin yanında yer alıb. Belədə proses müxalifətin fiaskosuna doğru gedir. Bu halda isə Konstitusiya Məhkəməsinin hansı qərar qəbul edəcəyindən asılı olmayaraq, Paşinyanın hakimiyyəti güclənir.

Elçin