Putin nüvə silahından istifadə etsə, nə olacaq ? – 5977 nüvə başlığı var…
Rusiya prezidenti Vladimir Putin keçən həftə sonu öz hərbi komandanlığına Rusiyanın nüvə qüvvələrinin hazırlıq vəziyyətinə gətirməyi əmr edib.
2020-ci ildə qəbul edilən "Rusiya Federasiyasının nüvə silahının qarşısının alınması üzrə dövlət siyasətinin əsas prinsipləri” adlı sənəddə Rusiya prezidentinin nüvə silahından istifadəsi barədə qərar qəbul etdiyi bildirilir.
Sfera.az bildirir ki, "Şeget” adlı kiçik portfel həmişə dövlət başçısının yanında saxlanılır. Bu çanta prezidenti Rusiyanın strateji nüvə qüvvələrinin komandanlıq və nəzarət şəbəkəsi ilə əlaqələndirir. Lakin bu kiçik çantanın silahları işə salmaq üçün "düyməsi” yoxdur.
Şeget sayəsində qərarlar və ya əmrlər Baş Qərargaha çatdırılır. Rusiya prezidentinin bu istiqamətdə qərarı buraxılış kodlarına çıxışı olan Baş Qərargaha ötürülür. Bu məqamda komandirlərin nüvə başlıqlı raketləri buraxmaq üçün iki variantı var. Birincisi, o, icazə kodlarını birbaşa silah komandirlərinə göndərə bilər, onlar daha sonra işə salma prosedurlarını yerinə yetirə bilərlər. Bu variantın həyata keçirilə bilməyəcəyi halda, ehtiyat plan da nəzərdən keçirilib.
"Perimetr" adlanan bu "B Planı" Birləşmiş Qərargah Rəislərinə bütün fövqəladə hallar üçün komanda məntəqələrindən yan keçməyə və raketləri birbaşa buraxmağa imkan verir.
Putinin ölkənin nüvə qüvvələrinin yüksək döyüş hazırlığı vəziyyətinə gətirilməli olduğu barədə bəyanatından bir gün sonra Rusiya Müdafiə Nazirliyi onun nüvə raket qüvvələrinin "qabaqcıl” döyüş vəziyyətinə gətirildiyini açıqlayıb.
Cenevrədəki Birləşmiş Millətlər Təşkilatının tədqiqatçısı Pavel Podviq Tvitterdə bildirib ki, bu sərəncam Rusiyanın nüvə komandanlığı və nəzarət sistemini aktivləşdirmiş və son buraxılış əmrləri üçün mahiyyətcə rabitə kanallarını açmış ola bilər.
ABŞ Alimlər Federasiyasının hesablamalarına görə, Rusiyanın 5977 nüvə başlığı var ki, bu da digər ölkələrin nüvə ehtiyatından çoxdur. Bunlardan 1588-i yerləşdirilib və istifadəyə hazır vəziyyətdə saxlanılır. Raketlər qurudan, sualtı qayıqlardan və təyyarələrdən buraxıla bilər.
Qeyd edək ki, Vladimir Putin fevralın 19-da Ukraynaya qoşun göndərməzdən bir müddət əvvəl Rusiyanın nüvə qüvvələrinin koordinasiyalı sınağını keçirib.
Əzizə Zeynal
