Meksikalı dizaynerlər Trampın çəkəcəyi 25 milyard dollarlıq “divarı” təsvir ediblər
Donald Tram seçkiöncəsi kampaniya zamanı ABŞ və Meksika sərhədində divar çəkməyə söz verib. O, bu yolla qeyri-leqal miqrasiya və sərhəddən narkotiklərin daşınması problemini həll etmək niyyətində olub. Bəs, reallıqda bu divar necə görünə bilər?
Meksikanın "Estudio 3.14” memarlıq studiyası ekspertləri hesablamalara görə, büdcəsi 15-25 milyard dollar təşkil edəcək layihəni vizuallaşdırmağa qərar veriblər.
Nəhəng çəhrayı rəngli divar Sakit okean sahilindən Meksika körfəzinə qədər 3200 km məsafədə uzanmalıdır.
Bundan başqa divarda Trampın saxlamağa və ABŞ-dan deportasiya etməyə söz verdiyi 11 milyon qeyri-leqal miqrant üçün nəhəng həbsxana nəzərdə tutulub.
Məhbusların darıxmamaları üçün elə divardaca onlar üçün tikinti materiallarının istehsalı üzrə zavod tikiləcək. Həmin materiallardan məhz çəkilən divarın tikintisi və təmirində istifadə ediləcək.
ABŞ-lıların isə darıxmamaları üçün divarda nəhəng ticarət mərkəzlərinin açılması nəzərdə tutulur. Yəqin ki, məhbusların bir hissəsi orada işləyəcək.
Peşəkar memarların hesablamalarına əsasən, tikintini hətta 25 milyard dollarlıq büdcə ilə belə qısa müddətə başa çatdırmaq mümkün deyil. Belə ki, Donald Trampın planı önündə dağlar durur. Lakin bütün bunlara baxmayaraq tikintinin icrasına qərar verilsə, bunun üçün təxminən 16 il vaxt tələb olunacaq.
Meksikalı memarların fikrincə bu epik miqyaslı mənasız ideyadır.
