Bayden “Taliban”ı tanımağa hazırlaşmır: “Qarşıda uzun zaman var...”
16:02 / 07.09.2021
1283
Xəbər verdiyimiz kimi, ABŞ prezidenti Co Bayden
"Taliban"ı tanımaq üçün qarşıda uzun zamanın olduğunu bildirib.
Ağ Ev rəhbəri bunun üçün bəzi işlərin görülməli
olduğunu diqqətə çatdırıb.
Maraqlıdır, Co Baydenin bu açıqlaması nəyə hesablanıb?
Mövzu ilə bağlı Sfera.az-a danışan politoloq Əlimusa
İbrahimov Bayden hakimiyyəti dövründə "Taliban"ın ABŞ tərəfindən tanınmayacağını
deyib:
"Bayden bu bəyanatla bəlkə də bildirmək istəyirdi
ki, onun prezidentliyi dövründə Taliban hökuməti Amerika Birləşmiş Ştatları tərəfindən
tanınmayacaq. Çünki "Taliban”ın Baydenin imicinə vurduğu zərbə son əsrdə
Amerikaya vurulan ən böyük zərbədir. Bu zərbənin nətcələrini aradan qaldırmaq
üçün onilliklər lazım gələcək.
Elə məhz buna görə də Amerika Birləşmiş Ştatları "Taliban”ı
hansı şərtlər daxilində tanıya biləcəyi haqda heç bir qərara gəlməyib. Dünyanın
müxtəlif ölkələri bu məsələdə tələsmək istəməsələr də artıq müəyyən şərtlər
daxilində yeni yaranan hökuməti tanıya biləcəklərini bəyan edirlər. Məsələn, Türkiyənin
xarici işlər naziri Mövlud Çavuşoğlu bildirib ki, Taliban ölkədə vətəndaş
müharibəsinin qarşısını alarsa və qadınların da daxil edildiyi inkluziv hökumət
qura bilərsə, o zaman onun tanınması barədə düşünmək olar. Amma bu, hələ tezdir
və gözləmək lazımdır".
Politoloq ABŞ-ın "Taliban"la münasibətləri
tamamilə pozmayacağını bildirib:
"ABŞ-ın "Taliban” rejimini tanımasına gəldikdə
isə fikrimcə, bunun üçün uzun müddət lazım olacaq. Qeyd etdiyim kimi, Bayden hökumətinin
bu rejimi tanıyacağını düşünmürəm. Bu hadisə növbəti prezidentlərin hakimiyyəti
zamanı baş verə bilər. Təbii ki, əgər o vaxta qədər "Taliban” bu gün dünya dövlətlərinə
verdiyi sözü tutarsa və onun qurduğu hökuməti tanıyan dövlətlərin sayı yetərincə
olarsa...
İnci