Bakıda inşaat işi ən çox bu rayonlarda həyata keçirilir – STATİSTİKA
11:41 / 06.05.2021
4468
2021-ci ilin birinci rübündə Bakıda 1,237 milyard manat dəyərində inşaat işləri həyata keçirilib. Ötən ilin eyni dövrünə nisbətən inşaat işlərinin həcmi 12,8 faiz azalıb.
Sfera.az rəsmi məlumatlara istinadən bildirir ki, bütün tikinti işlərinin 66 faizi 4 rayonda həyata keçirilib. İnşaat işlərinin həcminə görə ilk yerdə Nəsimi rayonu dayanıb. Burada tikinti işlərinin həcminin 21 faiz azalmasına baxmayaraq digər rayonlarla müqayisədə işlərin həcmi daha böyük olub. Nəsimi rayonunda 323,5 milyon manatlıq inşaat həyata keçirilib ki, bu da paytaxtdakı ümumi işlərin 26,15 faizini təşkil edib.
İnşaat işlərinin həcminin böyüklüyünə görə ikinci yerdə Səbail rayonu dayanır. Bu rayonda işlərin dəyəri 46 faiz artaraq 226 milyon manatı ötüb.
Tikintinin dəyərinə görə üçüncü sırada Xətai (138,6 milyon), dördüncü sırada Nərimanov (132,5 milyon) rayonları qərarlaşıb. Adıçəkilən 4 rayonda 821milyon manata yaxın iş görülüb ki, bu da cəmi işlərin 66,33 faizidir.
İlin birinci rübündə Bakıda ən az inşaat işi Xəzər (6 milyon manat), Sabunçu (12 milyon manat), Suraxanı (31,8 milyon manat) və Nizami (34,9 milyon manat) rayonlarında həyata keçirilib.
İlk 3 ayda Pirallahı rayonunda inşaat işi görülməyib.
Vasif
Sfera.az