Sfera.az xəbər verir ki, bu fikirləri İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib. 

Onun sözlərinə görə, 2021-ci ilin ilk 9 ayında Azərbaycanda ÜDM-nin artım tempinin yüksək olması qeyri-neft sektoru ilə bağlıdır: 

"Qeyri-neft sektoru 6,2 faiz böyüyüb. Buradakı böyümənin təsiri ilə ÜDM-də 4,8 faiz böyümə qeydə alınıb. BVF Azərbaycan iqtisadiyyatının bu il 3 faiz artmasını proqnozlaşdırır ki, bu da əvvəlki proqnozları üstələyir və milli iqtisadiyyata güvənin artmasını göstərir. Lakin milli iqtisadiyyatın artım tempi həm BVF-nin, həm də Dünya Bankının proqnozlarını əhəmiyyətli şəkildə üstələyir. Artıq Azərbaycanda iqtisadi artım tempi "Dünya iqtisadi icmalı”nda Orta Şərq və Mərkəzi Asiya üçün proqnozlaşdırılan 4,1 faizlik həddi üstələyib.”

V.Qasımlı ÜDM istehsalındakı artım sürətinin proqnozdan çox olmasını yüksək sənayeləşmə ilə əlaqələndirir: "Azərbaycanda ÜDM istehsalının 40,1 faizi sənayenin payına düşür. Dünyada sənayeləşmə ilə bağlı orta göstərici 24,8 faizdir və Azərbaycanda sənayeləşmə səviyyəsi orta göstəricidən əhəmiyyətli üstündür. Müqayisə üçün deyim ki, sənayenin ÜDM-də payı Mərkəzi Avropa və Baltik ölkələrində 27,2 faiz, Avrozonada 21,5 faiz və OECD ölkələrində isə 21,1 faizdir. Azərbaycanda sənayenin strukturunda da qeyri-neft-qaz sektorunun xüsusi çəkisi daha sürətlə artır. Azərbaycan dördüncü sənaye inqilabının tələblərinə uyğun inkişaf edir.”