Azərbaycan ən ucuz qazı İrana satır
15:39 / 16.06.2021
2190
2021-ci ilin yanvar-may aylarına aid olan ixrac göstəricilərinə əsasən Azərbaycan İrana 3,19 milyon dollar dəyərində 84 milyon kub metr təbii qaz satıb.
Sfera.az rəsmi məlumatlara istinadən bildirir ki, yanvar-aprel aylarında xarici ticarət göstəricilərinə dair məlumatda İrana qaz ixracına dair informasiya yox idi. İlk 5 aya aid olan məlumatda İrana qaz ixrac edilməsinə dair məlumatın yer alması ondan xəbər verir ki, mayda bu qonşu ölkəyə də qaz satılıb.
İran da nəzərə alınmaqla Azərbaycanın qaz ixrac etdiyi ölkələrin sayı 6-ya yüksəlib. Əvvəllər Azərbaycan Türkiyə və Gürcüstana qaz satırdı. TAP kəmərinin işə düşməsindən sonra İtaliya, Yunanıstan və Bolqarıstan da Azərbaycandan qaz almağa başlayıb.
Ölkəmiz 2021-ci ilin yanvar-may ayları ərzində ümumilikdə 9,174 milyard kub metr həcmində qaz ixrac edib. İxrac edilən qazın dəyəri 1,336 milyard dollar olub. Təbii qazın 5,884 milyard kub metri Türkiyəyə, 1,833 milyard kub metri Gürcüstana, 1,152 milyard kub metri İtaliyaya, 127,8 milyon kub metri Yunanıstana, 92 milyon kub metri Bolqarıstana, 84 milyon kub metri İrana satılıb.
Bu ölkələrdən ən yüksək qiymətə qazı Yunanıstan (256 dollar) və İtaliya (211 dollar), ən ucuz qazı İran (38 dollar) alıb.
Vasif
Sfera.az