21-ci əsr diplomatiyasının qarşısındakı yeni tələblər - deputat Könül Nurullayevanın şərhi
21:00 / 29.04.2020
3557
"Dünya nizamının sürətli dəyişmə dinamikası mürəkkəb bir sistemə çevrilən 21-ci əsr diplomatiyası qarşısında yeni tələblər qoyur. Belə ki, bu gün diplomatik münasibətlərin imperativləri çoxvektorlu xarici siyasət, inteqrasiya, eyni zamanda dövlətlərin milli maraqlarını təmin etməkdən ibarətdir".
Bunu millət vəkili Könül Nurullayeva deyib.
O, mövzunu şərh edərək, daha sonra qeyd edib: "Bu tendensiyanın şərtləri daxilində ən vacib məsələ xarici siyasətdə yeni, beynəlxalq dialoq formatlarını inkişaf etdirmək, eyni zamanda klassik mexanizmlərlə müqayisədə daha rəqabətli platformanın yaradılmasına nail olmaqdır. Bu kontekstdə xarici siyasətin prioritetlərinin reallaşmasında mühüm rol parlament diplomatiyası institutuna məxsusdur. Xüsusilə geosiyasi müstəvidə ən mürəkkəb situasiyalarda parlament diplomatiyasının imkanları da artır. Nəticə etibarı ilə parlament diplomatiyası beynəlxalq əməkdaşlığın effektivliyini artıran əsas vasitəyə çevrilir. Dövlətlər üçün vacib məsələ bu imkanlar dinamikasını qoruyub saxlamaqdır".
Deputat "Azərbaycan təcrübəsinə nəzər salaq - Azərbaycan parlament diplomatiyasının praktiki aspektləri həm ikitərəfli, həm də çoxtərəfli əməkdaşlıqla xarakterizə olunur" - deyə, qeyd edib: "Ümumiyyətlə, çoxsaylı beynəlxalq təşkilatların üzvü olaraq, Azərbaycan çoxtərəfli diplomatiyanı dəstəkləyir və bütün müstəvilərdə konstruktiv platformaların təşəbbüskarı qismində çıxış edir. Milli Məclis üzvləri beynəlxalq təşkilatlar çərçivəsində çox fəal iş aparırlar və bu fəaliyyətin davamlılığı hazırda əsas prioritetdir. Bu gün Azərbaycanın ali qanunverici orqanı ilə əməkdaşlıq edən təşkilatların qlobal qərar qəbuletmə proseslərinə cəlb olunması xüsusi önəm kəsb edir. Təbii ki, bu konteksdə dövlətin milli maraqlarının ən yüksək səviyyədə qorunması və təmsil olunması başlıca şərtdir. Ümumiyyətlə, milli maraqlar suverenlik, ərazi bütövlüyü, daxili işlərə qarışmamaq prinsipi və s. ölkənin xarici siyasətinin əsas hərəkətverici qüvvəsidir. Bu mənada ali qanunverici orqan beynəlxalq münasibətlərdə "yumşaq güc" effektinə malikdir. Yəni, parlamentlərarası konfransların, parlamentin monitorinq sistemlərinin və rəsmi nümayəndə heyətlərinin tərkibində obrazlı şəkildə desək, "parlament gözü"nün olması mütləqdir. Bu kontekstdə vacib elementlərdən biri - beynəlxalq strukturlara inteqrasiya və xarici parlamentlə şəxsi əlaqələrin qurulmasıdır ki, Cənab prezidentin də bəyan etdiyi kimi, bu, milli maraqlar və dövlətçilik əleyhinə yönələn hər hansı sövdələşmə ilə səhv salınmamalıdır. Xüsusilə əksər beynəlxalq təşkilatlarda xalqların, ölkələrin qarşılıqlı münasibətinə destruktiv təsir göstərən "ikili standartlar" praktikasının aktuallıq kəsb etdiyi bir vaxtda Azərbaycan parlamenti də öz imkanlarından çevik və səmərəli istifadə edərək, zəruri hallarda fəaliyyətini hücum diplomatiyası əsasında qurub. Aydındır ki, parlament diplomatiyası ilk növbədə qarşılıqlı əlaqə üçün açıq olan sabit tərəfdaş kimi dövlətin müsbət reputasiyasını qoruyub saxlamaqdan ibarətdir. Belə mürəkkəb şəraitdə beynəlxalq tribunalarda Azərbaycanın milli maraqlarının qorunmasına hesablanan arqumentləri daim gündəmdə saxlamaq, həqiqətləri dünya ictimaiyyətinə qəbul etdirmək zəruridir. Bu istiqamətdə atılan və bundan sonra atılacaq addımlar ölkəmizin mövqeyini daha da gücləndirəcək, Azərbaycanı beynəlxalq münasibətlər sistemində söz sahibinə çevirəcək".