Sfera.az-a açıqlamasında bu sözləri bir sıra ölkələrdə bayram günləri avtomobillər üçün parklama yerlərinin pulsuz olmasına və həmin təcrübənin ölkəmizdə tətbiqinə münasibət bildirərkən nəqliyyat məsələləri üzrə ekspert Azər Allahverənov deyib:

 

"Həqiqətən də bir sıra ölkələrdə müxtəlif bayram günlərində, xüsusən də Milad bayramı günlərində parklanma yerləri pulsuz olur. Amma Azərbaycanda hələlik belə bir praktika yoxdur. Əslində parklanma yerlərinin idarə olunması səlahiyyəti Bakı Nəqliyat Agentliyinə verilib. Amma bu günə qədər Bakı Nəqliyyat Agentliyinin həmin funksiyası hələlik işə salınmayıb. Bunun gələn ilin yanvarından sonra baş verəcəyi gözlənilir. Ona görə də bu gün Bakı küçələrinin hər hansı bir yerində parklanmaya görə hansısa ödənişlər tələb olunursa, bunlar qeyri-qanuni hallardır. Çünki həmin səlahiyyət Bakı Nəqliyyat Agentliyinə məxsusdur. Digər hər hansı bir qurumun bu kimi işləri həyata keçirməsi qeyri-qanunidir. İstənilən şəxs nəqliyyat vasitəsini parklama üçün nəzərdə tutulan yerlərdə ödənişdən azad şəkildə saxlaya bilər.

 

Şəhərin bir sıra yerlərində özəl ödənişli dayanacaqlar fəaliyyət göstərir. Bu sahə də müəyyən məsrəf tələb edir. Onların hansısa bayram günlərində ödənişsiz parklamaya getmələri isə kapital itkisi baxımından əlverişli deyil. Ona görə də özəl dayanacaq sahibləri bir sıra ölkələrdə olduğu kimi bayram günləri ödənişsiz kampaniyalar həyata keçirmirlər. Azərbaycanda bayram günləri ödənişsiz parkomatların həyata keçirilməsindənsə, yaxşı olar ki, özəl dayanacaqlar qiymət siyasətinə yenidən baxsın və qiyməti bir qədər aşağı salsınlar. Bu addıma gedilərsə, hazırda şəhərdə yolun sağ və solunda, avtomobilini hətta icazə verilməyən yerdə saxlayan sürücülər də rahat şəkildə həmin dayanacaqlardan istifadə edə bilərlər. Yəni həmin qurumlar əslində qiymət siyasətinə yenidən nəzər yetirib, onu aşağı salmaqla sürücülərin marağına cavab verən yanaşma sərgiləyə bilərlər. Bəzi ölkələrdə olduğu kimi, hansısa bayram günlərində həmin qurumlar sürücülərə pulsuz xidmət göstərsələr, bunu da ancaq alqışlamaq olar. Ancaq bazar iqtisadiyyatının öz şərtləri də var. Hər halda ödənişli dayanacaqlarda qiymətlər aşağı salınmalıdır”.

 

Qeyd edək ki, bir sıra ölkələrdə bu və ya digər bayram günlərində avtomobillərin parkomatlarda saxlanılması prosesi ödənişsiz olur. Məsələn, artıq ikinci ildir ki, Rusiyanın paytaxtı Moskvada Yeni il və Milad bayramı günlərində avtomobillər üçün bütün ödənişli parklanma yerləri pulsuzdur. Bu barədə Moskva şəhər Nəqliyyat Departamenti elan edib. Hansı ki, həmin qərar dekabrın 31-dən yanvarın 8-dək qüvvədə olacaq. Azərbaycanda isə hələ də bu sayaq təcrübələrdən yararlanmırlar.