Anspress-in məlumatına görə, bu barədə Vergilər Nazirliyinin mətbuat xidmətinin rəhbəri Şahin Məmmədov məlumat verib. Onun sözlərinə görə, Vergi Məcəlləsinə edilmiş bu dəyişiklik fiziki şəxslərin əmək
haqlarına verilən güzəştlərin əhatə dairəsinin genişləndirilməsini nəzərdə tutur.
Belə ki, Azərbaycan Respublikası Prezidentinin 7 dekabr 2015-ci il tarixli Fərmanı
ilə təsdiq edilmiş "Azərbaycan Respublikasının Vergi Məcəlləsinə dəyişikliklər
edilməsi barədə" Qanunla Məcəllənin 102.1.6-cı maddəsinə dəyişiklik edilib və
2016-cı ilin yanvar ayının 1-dən əsas iş yerində aylıq gəliri 2.500 manatadək və
illik gəliri 30 min manatadək olan fiziki şəxslərin gəlirlərinin müvafiq olaraq ölkə
üzrə yaşayış minimumunun 1 və 12 mislinədək olan hissəsinə gəlir vergisi üzrə
güzəştin tətbiqi nəzərdə tutulub.
Məlum olduğu kimi, ölkə üzrə aparılan sosial-iqtisadi siyasətə uyğun olaraq hər il
əmək haqları davamlı olaraq artırılır. Lakin muzdlu işçinin həmin artımdan
bəhrələnməsi imkanı yox idi. Çünki vergi qanunvericiliyində indiyədək qüvvədə olan
güzəştlərin tətbiqi mexanizmi elə qurulmuşdu ki, aylıq gəlirləri 250 manatdan az olan
fiziki şəxslərin əmək haqlarının artırılması nəticə olaraq həmin şəxslərin güzəşt
dairəsindən çıxmasına səbəb olurdu. Vergi Məcəlləsinə edilmiş dəyişiklik nəticəsində işçi əməkhaqqı artımından tam
bəhrələnə biləcək. Bu vergi güzəştindən həm dövlət sektorunda, həm də özəl
sektorda çalışan 500 mindən artıq insan faydalanacaq.Dəyişikliyi aşağıdakı nümunədən daha aydın görmək olar.
Əmək haqlarına tətbiq edilən vergi güzəşti son nəticədə ölkə əhalisinin gəlirlərini
artırmaqla onların maddi rifahının yaxşılaşmasına təkan verəcək. Bu addım əhalinin
gəlirləri artırmaqla onların maddi rifah halının yaxşılaşmasına müsbət təsir göstərəcək
və əmək haqlarının leqallaşmasını təşviq edəcək.