Sfera.az-a açıqlamasında bu sözləri Gürcüstanda prezident seçkilərinin ikinci turu və prosesin gedişində kimin qalib gələ biləcəyilə bağlı fikirlərini bölüşərkən politoloq Natiq Miri deyib:

 

"Həm nəzəri, həm də praktik olaraq Gürcüstanda keçirilən prezident seçkilərinin ikinci turunda müxalif namizəd Qriqol Vaşadzenin qalib gəlməsi ehtimalı çox böyükdür. Birinci turda bütün saxtakarlıqlara rəğmən Vaşadze 38 faiz yaxın səs toplamışdı. Digər müxalifət lideri Bakradze isə 11 faizə yaxın səs alıb ki, ikinci turda o elektoratı ilə birgə Vaşadzeyə səs verəcəyini bəyan edib. Üçüncü müxalif namizəd Natelaşvilinin də 3 faizdən artıq səsi vardı ki, o da müəyyən danışıqlardan sonra elektoratını Vaşadzeyə səs verməyə çağırıb. Bu isə o deməkdir ki, ikinci turda Vaşadze azı 52 faizdən çox səs ala bilər. Prosesdə hələlik qərar verməkdə çətinlik çəkənləri də yarı-yarıya bölsək, Vaşadzenin qələbəsi qaçılmazdır. Seçkilər az da olsa, demokratik olsa, müxalifət namizədinin qələbəsi təmin olunacaq”.

 

Total saxtakarlığa gediləcəyi təqdirdə isə, həmsöhbətimizə görə, bu İvanişvili iqtidarının sonuna gətirib çıxaracaq:

 

"Total saxtakarlıq olduğu halda, bu İvanaşvili hakimiyyəti üçün ciddi təhlükələr yaradacaq. Qərb dünyası həmin halda seçkinin nəticəsini tanımayacaq, bu da İvanaşvili hökumətinə problem yaradacaq. Gürcüstan cəmiyyətində də birinci turdan sonra artıq İvanaşvili hakimiyyətini yola salmaqla bağlı güclü inam formalaşıb. Belə olan təqdirdə, kütləvi saxtakarlığa getməklə hazırkı hakimiyyət güclü etirazlarla qarşılaşa bilər. Nəticə etibarı ilə İvanaşvili iqtidarının növbəti parlament seçkilərinə qədər hakimiyyətdə qalıb-qalmaması da böyük şübhə doğura bilər. İvanaşvili seçiciləri öz tərəfinə çəkmək üçün müəyəyn cəhdlər etdi. 560 minə qədər insanın banklara olan borcları silindi. Ancaq düşünürəm ki, bunun özü də gücrü cəmiyyətində tərs təpki, anlaşılmazlıqlar yaratdı. Zurabişvilinin xeyrinə rus meylli gürcü siyasətçiləri birləşib. Kreml onları təcili qaydada Moskvaya toplayaraq, instruktaj verib. Hətta öz nümayəndələrini təcili şəkildə Tiflisə göndəriblər ki, bilavasitə seçki prosesilə məşğul olsun. Ancaq bütün bunlara rəğmən gürcü xalqında dəyişiklik istəyinin hiss olunası fonunda Vaşadzenin qalib gəlmək şansları daha yüksəkdir. Bu fonda İvanaşvili hakimiyyətinin total saxtakarlığa getməsi öz hakimiyyətləri üçün ölüm təhlükəsinin yaranması demək olacaq”.

 

Qeyd edək ki, artıq Gürcüstanda prezident seçkilərinin ikinci turuna start verilib. Mübarizə iki namizəd arasında, hakim "Gürcü Arzusu-Demokratik Gürcüstan” partiyasının dəstəklədiyi Salome Zurabişvili və "Güc birlikdədir” təşkilatının namizədi Qriqol Vaşadze arasında gedir. Onu da vurğulayaq ki, birinci turda Zurabişvili səslərin 38,64, Vaşadze isə 37,74 faizini toplamağa nail olub. Gürcüstan qanunvericiliyinə görə, ikinci turda sadə səs çoxluğu toplayan namizəd qalib gələcək.