\"O gecə gördüklərimi hələ də unuda bilmirəm\"
20 Yanvar faciəsi bizim qan yaddaşımızdır. Heç bir zaman bu tarixi unutmayacağıq. Əfsuslar olsun ki, xalqımız belə bir faciə yaşadı. Həmin gecə neçə-neçə övladlarımızı, cavanlarımızı itirdik, neçə ailənin çırağı söndü. Sovet Ordunun xalqımıza qarşı törətdiyi vəhşiliyi nifrətlə yada salırıq.
Sfera.az xəbər verir ki, bu fikirləri Auditorlar Palatasının auditoru Şəmsinur Hüseynov AZƏRTAC-a müsahibəsində bildirib.
Daha sonra Ş. Hüseynov həmin gecə ilə bağlı xatirələrini bölüşüb: "Yaqub adında bir qonşumuz var idi. 20 Yanvar gecəsi qonşumuz da atışma baş verən ərazidən keçirmiş. Onun da maşınını vurmuşdular. Özü də xəsarət almışdı. Başından, üzündən, qolundan, ayağından yaralanmışdı. Hazırda I qrup əlildir. O gecə gördüklərimi hələ də unuda bilmirəm".
Ş. Hüseynov dedi: "Allahdan şəhidlərimizə rəhmət diləyirik. İndi də bu hadisəni gənclərimizə, uşaqlarımıza danışır, onların da bu vəhşilikdən xəbərdar olmasına çalışırıq".