Nəsimidə müharibə və əmək veteranları ilə görüş keçirilib
Novruz bayramı ərəfəsində Nəsimi rayon İcra Hakimiyyətində çay süfrəsi arxasında müharibə və əmək veteranları ilə görüş keçirilib.
"Qafqazinfo"ya daxil olan məlumata görə, görüşdə çıxış edən Nəsimi rayon İcra Hakimiyyətinin başçısı Asif Əsgərov II Dünya Müharibəsində Faşizm üzərində tarixi qələbənin qazanılmasında Azərbaycan övladlarının göstərdikləri qəhrəmanlıqlarından danışıb.
Qeyd edib ki, dünyanın faşizm taunasından xilas edilməsində misilsiz döyüş rəşadəti göstərən müharibə veteranları hər cür qayğı və diqqətə, hörmət və ehtirama layiqdirlər.
Respublika Veteranlar Şurasının sədri general-mayor Dadaş Rzayev müharibə veteranlarına göstərilən böyük diqqət və qayğıdan razılığını bildirib. Əlavə edib ki, II Dünya Müharibəsinin odlu-alovlu yollarından keçən döyüş rəşadəti göstərən veteranlarla belə görüşlərin gənclərin hərbi vətənpərvərliyi və milli-mənəvi dəyərlər uğrunda tərbiyəsində böyük rol oynayır.
Tədbirdə Respublika Veteranlar Şurasının sədri general-mayor Dadaş Rzayev tərəfindən veteranlara göstərilən müstəsna diqqət və qayğıya görə Nəsimi rayon İcra Hakimiyyətinin başçısı Asif Əsgərov "Veteran Həmrəyliyi” medalı ilə təltif olunub. Tədbirin sonunda veteranlara Novruz bayramı ilə əlaqədar bayram sovqatları təqdim edilib.