"İsa bəyin Arif Hacılını dəstəkləyəcəyinə şübhə etmirdim. Onun bu addımı mənim üçün gözlənilməz olmadı”.

Sfera.az-a açıqlamasında bu sözləri Müsavatın qurultayı ərəfəsində partiya lideri İsa Qəmbərin namizədlər sırasından hazırkı başqan Arif Hacılını dəstəkləyəcəyini açıq şəkildə bəyan etməsinə münasibət bildirərkən digər namizəd Yadigar Sadıqlı deyib:

"Ən yaxşı halda gözləyirdim ki, İsa bəy bitərəf qalar. Lakin görünür İsa bəy başqa qənaətə gəlib. Nə deyim, bu İsa bəyin hüququdur, o hüququ məhdudlaşdırmaq olmaz. Lakin onun bu mövqedə olmasına təəccüb edirəm. Müsavatın son 5 il ərzində tənəzzülə uğramasını görmək üçün xüsusi alətə ehtiyac yoxdur. İsa bəy hansı uğurlardan bəhs edərək, hansı ümidlərlə Arif Hacılını dəstəklədiyi mənə məlum deyil. Təəssüf ki, İsa bəyin bu mövqeyi qurultayda Arif bəyin qələbə ehtimalını xeyli artırıb. Bu da dolayısı ilə Müsavatın azı daha 4 il ərzində tənəzzül prosesinin davam etməsini şərtləndirir. Bununla belə, qeyri-bərabər vəziyyətə düşsək də, şəxsən mübarizəni davam etdirməkdə israrlıyam. Bir namizəd olaraq Müsavatı daha irəli aparmaqda və yenidən gücləndirməkdə israrlıyam və sona qədər mübarizə apararaq qalib gəlməyə çalışacağam”.

Müsavat başqanlığına digər namizəd Tofiq Yaqublunun isə məsələyə münasibəti bir qədər mülayim olub: "İsa bəyin seçiminə normal baxıram, bu bir demokratiya ənənəsidir. Müsavat Partiyası demokratik təşkilat olduğundan burada hər kəs, o cümlədən onun əvvəlki başqanı da kimə istəsə səs verə və onun təbliğatını apara bilər. Bu normal haldır”.

Elçin