Bir müddət əvvəl mikroinfarkt keçirən müğənni Nurlan Əzizbəylinin səhhəti artıq normallaşıb. Xeyli müddətdir ev şəraitində müalicə alan müğənni tədbirlərdən birində qonaq olaraq iştirak edib.

Sənətçi APA TV-yə açıqlamasında bildirdi ki, özünü yaxşı hiss edir: "Şükürlər olsun, artıq yaxşıyam. Çox böyük şükürlər olsun. Əvvəl bir az qorxulu idi vəziyyət. Müayinələr olandan, müalicədən sonra şükürlər olsun, irəliyə doğru getdim. Problemlərdən, stressdən uzaq olmağa çalışırdım”.

O, uzun müddət sənətdə olmasına və kifayət qədər dostu olmasına baxmayaraq, özünə qarşı gördüyü etinasızlıqdan inciyib: "Nəticəsi belə oldu. 32 ilimi bu sənətə sərf etmişəm. 8 yaşından böyük səhnələrdəyəm. Laqeydlik məndə də ruh düşkünlüyü yaradır”.

Nurlan Əzizbəyli fürsətdən istifadə edib, dar günündə yanında olanlara təşəkkürünü bildirib: "Yanımda çoxları oldu. İlk növbədə əziz qardaşım, dostum, neçə illərin sənət dostu İzzət Bağırov mənə çox böyük dəstək oldu. Teymur Əmrah, Rahidə Baxışova, "Kristal” qrupunun rəhbəri Mədinə xanım, gözəl bəstəkarımız Kəmalə Qasımova, Nüşabə Ələsgərli, Elnur Quliyev, bir çoxları...”

Amma Nurlan Əzizbəylinin gözünü yolda qoyanlar da az deyil: "Xəstə olan hər bir kəsin gözü yolda olur. Adicə mənəvi dayağa da ehtiyac duyur insan. Təbii ki, gözüm yolda idi. Həmin anda bilindi ki, mənim xətrimi istəyənlər kimdir. Könlümdən keçənlər çox idi ki, onların da pis günlərində, yaxşı günlərində həmişə onlara dayaq olmuşam. Sadəcə, ad çəkmək istəmirəm. Buradan baxacaqlarsa, hərə öz sözünü götürəcək. Sağ olsunlar!”