Həşərat dişləməsi həyatını dəyişdi: Barmaqları və ayaqları amputasiya olundu
İngiltərənin Uiltşir qraflığının Hayvort şəhər sakini həşərat dişləməsi nəticəsində təhlükəli infeksiyaya tutulub və ayaqlarını itirib.
Bu barədə "Daily Mirror” qəzeti məlumat yayıb.
68 yaşlı Syuzan Batteri bağçada işləyib.
Günün sonunda özündə halsızlıq hiss edib:
"Məndəki əlamətlər qripə çox oxşayırdı. Həyat yoldaşımla həkimə getdik. Allergiya olduğumu düşündülər”.
Həkimlər xəstəni müşahidə üçün xəstəxanada saxlayıblar.
Ertəsi gün əri Baterrini ziyarətə gəlib və xəstənin təcili olaraq reanimasiyaya aparılaraq süni komaya salındığını öyrənib.
"Çox qorxurdum. Huşum tez-tez gedib-gəlirdi. Daxili orqanlarım bütünlüklə çirk edibmiş. Nəfəs almaqda çətinlik çəkirdim. Buna görə həkimlər boğazıma nəfəs almağım üçün xüsusi vasitə yerləşdirdilər”, - deyə Syuzan bildirib.
Qadında "Streptococcus pyogenes” və ya "Clostridium perfringens” infeksiyalarının yaratdığı "Nekrotik fasçiit” olduğu aşkarlanıb. Baterri səkkiz ay xəstəxanada qalıb və 60 əməliyyat keçirib. Xəstənin həyatını xilas etmək üçün cərrahlar ayaqlarını və əl barmaqlarının falanqasını amputasiya etməli olublar.
İngilis qadına protezlər taxılıb və arıqlamaq tövsiyə edilib.
"İndi yeni dostlar tapmışam. Biz görüşərək uğurlarımızı və arıqlamağın yollarını müzakirə edirik. Bununla belə, bağı sevməkdən imtina etmədim. Mənim təmiz havada vaxt keçirməkdən və quşların səsini dinləməkdən xoşum gəlir. Lakin indi daha diqqətliyəm və ətrafdakı səslərə daha çox diqqət yetirirəm”, - deyə Syuzan əlavə edib.