"Bavariya” klubu futbolçularını Almaniya milli komandasına buraxmaqdan imtina edə bilər.

Sfera.az bildirir ki, bunu Münhen təmsilçisinin prezidenti Uli Höness açıqlayıb.

Yığmanın iki qapıçısı – Manuel Noyer və Andre Ter-Şteqen arasında münaqişəyə biganə qalmayan klub rəhbəri əsas komandanı boykotla hədələyib: "Əgər Noyeri milliyə çağırmağı dayandırsalar, biz oyunçularımızı ora göndərməyəcəyik. Bizi belə vəziyyət qane etmir. Bununla bağlı baş məşqçi Yoahim Lövlə söhbət etməyəcəyəm. O, artıq nə dediyimi eşidib”.

"Barselona”nın qapıçısı A.Ter-Şteqen yığmada M.Noyerin əvəzləyicisi olmaq istəmədiyini açıqlayıb ki, bu da qolkiperlər arasında söz savaşı ilə nəticələnib. U.Höness hesab edir ki, baş məşqçi Yoahim Löv məsələdə sözünü deməlidir: "Löv cənab Ter-Şteqenlə danışmalıdır. Baş məşqçi onu küncə qoymalı və belə açıqlamaların məqbul olmadığını izah etməlidir”.

Qeyd edək ki, A.Ter-Şteqen AVRO-2020-nin seçmə mərhələsinin bu ay keçirilən son iki oyununda da M.Noyerlə rəqabəti uduzaraq ehtiyatda qalıb.