Ermənistan və Azərbaycan xarici işlər Nazirlərinin Moskva görüşü haqda Rusiya mətbuatı maraqlı detallar açıqlayıb.

Rusiya mətbuatının yazdığına görə, qarşılıqlı razılaşmaya əsasənhər iki ölkədə saxlanan əsirlərlə görüşmək ümün yaxınlarının səfərlərinə şərait yaradılacaq. Qarşılıqlı səfər və ziyarətlərin ATƏT-in Minsk Qrupunun nəzarəti ilə baş tutuacağı haqda da məlumatlar yayılıb.

Maraqlıdır, bu ziyarətin harada baş tutacağı ilə bağlı təfərrüatlar açıqlanmayıb və bu haqlı olaraq suallar doğurur. Məsələn, yaxınları hazırda erməni tərəfinin girovluğunda olan Azərbaycan vətəndaşları - Dilqəm Əsgərov və Şahbaz Quliyevlə harada görüşə bilər?

Politoloq Elxan Şahinoğlu Sfera.az-a açıqlamasında bildirib ki, yaxşı olardı əsirlər "hamının hamıya prinsipi” ilə dəyişdirilsin. Amma Ermənistan tərəfi buna getmir: "Paşinyan deyir ki, Dağlıq Qarabağda saxlanılan iki girovun onlara aidiyyatı yoxdu. İndi də istəyirlər ki, ailələri onlarla görüşsün. Əlbəttə bu mümkündü. Sadəcə mənim üçün təsəvvür etmək çətindir ki, Xankəndində saxlanılan girovların ailəsi həmin əraziyə necə gedəcək.”

Elxan Şahinoğlu bildirir ki, Moskva görüşündə münaqişənin həllindən çox başqa detallar müzakirə olunub. Lakin bunlar münaqişənin köklü həllini yaxınlaşdırmır: "Xatırlayırsınızsa, jurnalistlərin qarşılıqlı səfərləri vardı. 1995-2000-ci illərdə onlarla belə səfər baş tutub. Mən özüm həmin səfərlərin bir neçəsində iştirak etmişəm. Amma bu cür dialoqlar münaqişənin həllində zərrə qədər də təsirli olmur. Yenidən eyni siyasətə qayıdırıq, amma bunun faydalı olacağını zənn etmirəm”.

Rəşad