“Uşaqpulu verilməlidir, amma ödəmə şərtlərində...” – İqtisadçıdan açıqlama
10:50 / 05.04.2021
891
"Ölkədə durum dəyərləndirməsi üçün etibarlı
statistika yoxdur. Əvvəla, bütövlükdə etibarlı yoxsulluq statistikası yoxdur.
İkincisi, əksər dünya ölkələrində olduğu kimi, uşaq yoxsulluğu ayrıca ölçülmür”.
Sfera.az xəbər verir ki, bunu tanınmış
iqtisadçı-ekspert Rövşən Ağayev son günlər müzakirə obyekti olan uşaqpulu
mövzusundan danışarkən deyib:
"Uşaqlarla bərabər ahılların sosial müdafiəsində
ciddi boşluqlar var. İşləyənlərin yoxsulluğu barədə hər hansı güvənilələcək
informasiya yoxdur. Ölkədə 65 yaşına çatan hər 100 nəfərdən az qala 60 nəfərinin
pensiya hüququ qazana bilməməsi riski var, işsizlik riski ilə üzləşən hər 100 nəfərdən
30-55 nəfərinin işsizlik sığortası şansı ola ya olmaya. Eyni zamanda övlad
dünyayaya gətirən hər 100 anadan ən yaxşı halda 20-25 nəfərinin sosial müdafiə
mexanizmləri ilə əhatə olunmaq şansı var”.
Odur ki, məsələyə daha geniş və kompleks
yanaşıb sosial müdafiə sisteminin hər bir elementinin təkmilləşdirilməsi,
yoxuslluq və işsizliyin dəqiq ölçülüməsi ilə bağlı gündəlik tələbə çevirmək
lazımdır. Məsələn, isşizlik və yoxsulluğun alternativ ölçülməsi artıq qaçılmaz
reallığa çevrilib. Ancaq bu yolla rəsmi şəkildə manipulyasiyalara son vermək
mümkün olacaq”.
Ekspert bildirib ki, müzakirələrdəki üslub,
xüsusilə təhqirlərlə müşayiət olunan mövqelər qəbuledilməz olsa da, uşaqpulu
mövzusunda sosial şəbəkələrdə geniş dartışmanın olması müsbətdir:
"Cəmiyyətin marağına toxunan, həlli vacib olan
istənilən məsələnin söyüş və təhqirsiz ən emosianal şəkildə belə eninə-boyuna
dartışılmasından sonda qazanan cəmiyyətdir. Həm də zatən siyasi qüvvələrin etməli
olduqları ən vacib işlərdən biri budur. Məsələn, bir xeyli müddət əvvəl REAL-ın
pusluz ali təhsillə bağlı təşəbbüsünü ictimai müzakirəyə çıxarması təqdir ediləsi
addım idi.
Amma belə müzakirələrlə bağlı 1-2 "əmma"nı
deyim. Ciddi siyasi qüvvələrin istənilən
təşəbbüsü ümumi bir fikir, yalnız sözlərdən ibarət təkliflər kimi ortaya atması
bü gün gördüyümüz qarşılıqlı söyüşmə mənzərəsini ortaya çıxarır. Ən doğru
yanaşma odur ki, mövzunu ortaya atan şəxs müzakirələrin daha peşəkar getməsi
üçün 5-7 səhifədən ibarət bir mövqe sənədi vasitəsilə bunu etsin. Müdafiə
etdiyi iddanı əsaslandırmaq üçün uğurlu ölkə
təcrübələrindən nümunələr, samballı tədqiqatlardan istinadlar əsasında dəstəkləyici
arqumentlərdən istifadə etsin. Eyni zamanda, öz iddiasına qarşı olan əks
arqumentləri də səsləndirsin və onların niyə yanlış olduğuna qarşı özünün dəlillərini
qoysun. Sonda əsaslandırılmış tövsiyyələrini versin. İnanıram ki, peşəkar
hazırlanmış sənədlər ortada olsa, müzakirələr də peşəkar müstəvidə gedəcək,
söyüş və təhqir ortadan qalxacaq”.
R.Ağayev son olaraq vurğulayıb ki, uşaqpulu
verilməlidir: "Lakin burada fikir ayrılığı yalnız ödəmə şərtlərində, məbləğində,
əhatə dairəsində, müddətində ola bilər”.
Qeyd edək ki, ötən həftə Respublikaçı
Alternativ (REAL) Partiyasının sədri İlqar Məmmədovun uşaqpulu ilə bağlı düşüncələri
sosial mediada etiraza səbəb olub. "Sadəcə "uşağım var, dövlət mənə
pul versin” təsəvvürünü insanlarda yetişdirənlər ya nə danışdıqlarını heç
anlamırlar, ya da xalqa vicdanlı xidmət hissini tam itiriblər” -, deyə partiya
sədri bildirib.