Türkiyədən 10 manata alınan mallar Azərbaycanda 50 manata satılır - Səbəblər
İqtisadiyyat
13:38 / 14.07.2021
799
Son 2 ildə Türkiyədə milli valyutanın kəskin
ucuzlaşmasına baxmayaraq bu ölkədən idxal edilən geyim malları Azərbaycanda olduqca
yüksək qiymətə satılır. Türkiyə və Azərbaycanın pərakəndə satış bazarında
mövcud olan qiymətlərin müqayisəsi göstərir ki, bir çox geyim növlərində qiymət
fərqi 3-4 dəfəyə çatır. "Qardaş ölkə”də 10 manata satılan geyim malları ölkəmizdə
30-40, hətta bəzi hallarda 50 manata satılır.
Sfera.az bildirir ki, Azərbaycana idxal edilən
geyim mallarının təxminən yarısı Türkiyədən gətirilir. 2021-ci ilin yanvar-may
ayları ərzində 100 milyon dollara yaxın geyim malları idxal olunub ki, bunun da
49,1 milyon dolları Türkiyədən alınıb.
İqtisadçı-ekspert Nazim Bəydəmirli Sfera.az saytına
açıqlamasında bildirdi ki, türk geyim mallarının mənşə ölkə ilə müqayisədə Azərbaycanda
bir neçə dəfə baha satılması sahibkarlarla bağlı olan məsələ deyil. Ekspertin
fikrincə, qiymətlərdə yaranan kəskin fərq Dövlət Gömrük Komitəsinin fəaliyyəti
ilə bağlıdır: "Əgər qiymətlərin formalaşması yalnız biznes adamlarından asılı
olsaydı kəskin qiymət fərqi yaranmazdı. Biznes rəqabəti sevir və rəqabət olan
yerdə də qiymətlər daha əlverişli olur.
Qiymətlərin kəskin fərqlənməsinin yeganə səbəbi gömrük
orqanlarının apardığı fiskal siyasətdir. Gömrük Komitəsi proqnoz göstəricilərini
artırmaq məqsədilə idxal edilən mallar üzrə bəyannamə qiymətini şişirdir və nəticə
etibarilə süni qiymət artımı yaradılır. Buna qarşı sahibkarlar öz etirazlarını vaxtaşırı
bildirir. Amma etirazlar nəticə vermir, əksinə, idxal edilən mallar günlərlər,
həftələrlə, gömrük anbarlarınada saxlandığından sahibkarların xərcləri artır.
Beləliklə, qiymətlərə təsir edən əsas səbəblər dövlətin
müəyyənləşdirdiyi tariflərlə bərabər gömrük orqanının apardığı siyasətdir. Çox
təəssüf edirəm ki, Azərbaycanda istehsal edilməyən mallar ölkə bazarına daxil
olan zaman belə süni maneələri aşmağa məcbur olur”.
Vasif
