“Türkdilli dövlətlərin birgə hərbi təlimləri keçirilə bilər” - Açıqlama
11:40 / 18.05.2021
1888
"Azərbaycan Qazaxıstanla inteqrasiyanı gücləndirməlidir”.
Sfera.az xəbər verir ki, bunu sözləri "Atlas”
Araşdırmalar Mərkəzinin rəhbəri Elxan Şahinoğlu özünün sosial şəbəkə hesabında
yazıb.
Həmsöhbətimizin fikrincə, Azərbaycan və
Qazaxıstan prezidentlərinin telefon danışığına ehtiyac var idi: "Ermənistanın
baş naziri Nikol Paşinyan Kollektiv Təhlükəsizlik Müqaviləsi Təşkilatına (KTMT)
üzv olan dövlətlərin liderlərinə zəng edərək Azərbaycanla sərhəddə baş verənlər
haqqında yanlış məlumatlar verir. Azərbaycan
Ermənistanla sərhədlərini müəyyənləşdirir. Nikol Paşinyan isə bunu belə izah
etməyə çalışır ki, guya Azərbaycan hərbçiləri Ermənistan ərazisinə daxil olur və
buna görə də guya KTMT-yə üzv olan dövlətlər Ermənistanı müdafiə etməlidirlər.
Paşinyan quruma üzv olan Qazaxıstana da zəng edib. Ancaq Qazaxıstan prezidenti
daha sonra Azərbaycan prezidenti ilə də telefonla danışıb və mövcud durum barədə
hərtərəfli məlumat əldə edib. Qazaxıstan Azərbaycanın ərazi bütövlüyünü hər
zaman dəstəkləyib”.
Politoloq qeyd edib ki, Azərbaycan və
Qazaxıstan siyasi, iqtisadi və hərbi əməkdaşlığın inkişafında maraqlı
olmalıdırlar. Onun fikrincə, bu əməkdaşlıqda xüsusən də hərbi sahəyə daha çox
diqqət ayrılmalıdır: "Qazaxıstanın
istehsal etdiyi hərbi texnikanı bir sıra dövlətlər alır. Türkiyənin özü də
Qazaxıstanla hərbi texnikanın birgə istehsalına maraq göstərir. Azərbaycan həm
Qazaxıstandan müasir hərbi texnika ala bilər, həm də onun birgə istehsalını
reallaşdıra bilər”.
E.Şahinoğlu düşünür ki, Azərbaycan ikitərəfli əməkdaşlıqla
yanaşı, Qazaxıstanla türk dünyasına inteqrasiya çərçivəsində də əməkdaşlığı
genişləndirməlidir: "Azərbaycanın müharibədə qələbəsindən sonra türkdilli dövlətlərin
Türkiyə ilə siyasi və hərbi inteqrasiyası güclənib. Azərbaycandan sonra
Qazaxıstan və Özbəkistan da Türkiyə ilə birgə hərbi təlimlər keçirib”.
Politoloq gələcəkdə türkdilli dövlətlərin birgə
hərbi təlimlərinin keçirilməsini də mümkün hesab edir: "Digər tərəfdən
Qarabağın yenidən qurulması, inşaat və infrastuktur çalışmalarına Qazaxıstanın
cəlb olunması da xeyrimizədir. Bir sözlə,
Azərbaycan, Türkiyə və Qazaxıstan Türk Şurasının siyasi, iqtisadi və hərbi
inteqrasiyasının gücləndirilməsində lokolomiv rolunu oynaya bilərlər”.