Sosial şəbəkələrdə "Naxçıvan" Universiteti MMC-nin ləğv edilməsi ilə bağlı məlumatlar yayılıb.

 
Sfera.az saytı məsələ ilə bağlı universitetin insan resursları və karyera planlaması şöbəsinin müdiri Ellada Mahmudova ilə əlaqə saxlayıb.

Bildirilib ki, universitet 30 iyun tarixindən fəaliyyətini dayandırıb. Hazırda təhsil müəssisəsinin yerində hərbi kollec fəaliyyət göstərir. Həmçinin kreditorlar iki ay ərzində tələblərini Naxçıvan şəhəri, Babək məhəlləsi ünvanına bildirə bilərlər.

 
Qeyd edək ki, MMC 1999-cu ildə qeydiyyata alınıb, rəsmi təmsilçisi Anar Kazımov, nizamnamə kapitalı 500 manatdır.

 
Naxçıvan Universiteti 1994-cü ildən 1999-cu ilə kimi Naxçıvan bazası kimi fəaliyyət göstərib. Ədliyyə Nazirliyi 05 iyul 1999-cu il tarixli 33 saylı şəhadətnamə ilə müəssisəni Naxçıvan Özəl Universiteti adı ilə dövlət qeydiyyatına alıb. Universitet Azərbaycanın paytaxtı Bakı şəhərindən kənarda yerləşən yeganə özəl ali təhsil ocağı idi.

 
Bu ilin fevral ayında Naxçıvan Universitetinin bağlanması ilə bağlı nazirliyə müraciət olunub. Universitetin bağlanması təsisçinin qərarıdır. Universitetdə təhsil alan 4-cü kurs tələbələri bu il məzun olacaqlar. Aşağı kurslarda təhsil alan tələbələr isə başqa universitetlərə köçürüləcək.

Firuzə Əliyeva