Tanınmış pediatr uşaqlar arasında kütləvi yayılan xəstəliyin səbəbini AÇIQLADI
12:03 / 06.01.2022
751
Son vaxtlar uşaqlar arasında yayılan virus artıq valideynləri narahat edir.
Sfera.az-ın məlumatına görə, bu barədə tanınmış pediatr Vaqif Qarayev bildirib ki, əvvəllər adi burun tutulmasına insanlar "qripəm” deyib keçə bilsə də, indi COVİD-19 durumu tamam dəyişib, hamı virusun adını bilmək istəyir.
Mütəxəssis qeyd edib ki, indiki xəstəlikləri yaradan qrip (influenza) virusudur:
"Güclü yoluxuculuq müşahidə olunur - aqressiv qızdırma, üzücü quru öskürək, burun axıntısı, boğaz ağrıları əsas əlamətlərdir. Südəmər uşaqlar xəstəliyin ilk günündən həkim müayinəsindən keçməlidir. Digər yaş qruplarında qızdırma 3-4 gündən artıq davam edərsə, həkim müayinəsi vacibdir! Evdə yalnız qızdırma salıcıların terapevtik dozasından istifadə etmək olar. Antibiotik və digər dərmanları müayinədən sonra həkim yazacaq, özünümüalicə düzgün deyil!”.
Pediatr qorunma yollarının standart olduğunu əlavə edib:
"Bunlar əlləri tez-tez yumaq, maskadan istifadə etmək, insanların sıx olmadığı yerlərdə - açıq havada olmaq, qida rasionunda meyvə-tərəvəzdən bol istifadə etmək. Xəstə uşaq isə, bağçaya və məktəbə getməməlidir, yoxsa, yoluxma azalmayacaq”.
Günay Rəsulqızı
Sfera.az