"Azərbaycanla müharibə yox, sülh olacaq"- Paşinyan

Ermənistanın baş naziri Nikol Paşinyan 9 May – Faşizm üzərində Qələbə Günü münasibətilə xalqa müraciətində regionda sülhün bərqərar olacağına dair nikbin mesajlar verib. 

Sfera.az xarici mediaya istinadən xəbər verir ki, onun sözlərinə görə, Ermənistan Respublikası azadlıq, demokratiya və sülh yolunda irəliləyir və bu istiqamətdə qətiyyətlidir.

“Bu gün bizim regionumuzun dinc və firavan gələcəyinə töhfə vermək imkanımız var. Ermənistanla Azərbaycan arasında sülh və dövlətlərarası münasibətlərin qurulmasına dair saziş layihəsi artıq qəbul edilib və imzanı gözləyir. Biz bu yolla gedəcəyik,” – Paşinyan vurğulayıb.

Baş nazir bütün daxili və xarici təxribatlara baxmayaraq, Ermənistan ilə Azərbaycan arasında müharibə olmayacağına, əvəzində sülhün bərqərar olacağına əminliyini ifadə edib.

O, həmçinin bildirib ki, bu yol asan olmasa da, onu sona qədər getməyə dəyər: “Bu yolda inam, sağlam düşüncə, ardıcıllıq, cəsarət və dürüstlük lazımdır. Özünü və tarixini tanımaq, tariximizin bizə göndərdiyi mesajları oxumaq və anlamaq bacarığı vacibdir”.

Paşinyan əlavə edib ki, Ermənistanın tarixini yenidən oxuyaraq belə qənaətə gəlib: tarixi Ermənistan deyil, əsl Ermənistan üzərində dayanmaq daha doğrudur.

Fidan Hacızadə
Sfera.az