Rusiya-Ukrayna müharibəsinin başlamasından dərhal sonra müdafiə səriştəsini gücləndirmək üçün hərbi xərclərini rekord həddə çatdırmağa qərar verən Almaniya hökuməti indi də ordunu müharibəyə hazır vəziyyətə gətirmək üçün addımlar atır.

Sfera.az xarici KİV-ə istinadən xəbər verir ki, Almaniyanın müdafiə naziri Boris Pistorius tərəfindən yeni bir mərhələ kimi təsvir edilən struktur islahatları Alman ordusunu çevik əməliyyat bacarıqları ilə gücləndirmək məqsədi daşıyır. Buna uyğun olaraq, Bundesverin (Almaniya Silahlı Qüvvələri) daxili və xarici əməliyyatları artıq Birgə Komandanlıq və Əməliyyat Mərkəzi Komandanlığı tərəfindən tək mənbədən koordinasiya ediləcək. Alman ordusu da yeni bir döyüş növü olan kiber müharibəyə hazır olacaq. Quru, hava və dəniz qüvvələrinə dördüncü qüvvə əlavə olunacaq: Kiber və İnformasiya Qüvvələri. Bu qüvvə strukturu hibrid təhdidləri təhlil edəcək və elektron müharibə və kiber əməliyyatlar, kəşfiyyat və elektron infrastrukturun mühafizəsi kimi məsələlərə cavabdeh olacaq. Dəstək Komandanlığı da yaradılacaq. Bu komandanlıq nüvə, bioloji və ya kimyəvi hücum zamanı bütün dörd qüvvə komandanlığına tibbi ləvazimat və maddi-texniki dəstək verəcək.

Müdafiə naziri Pistorius bu islahatları 6 ay ərzində həyata keçirməyi hədəflədiklərini açıqlayıb.

Rusiyanın Avropa üçün yaratdığı təhlükənin gücləndiyinə və bu səbəbdən ordunu fövqəladə hallarda ölkəni müdafiə etməyə hazır vəziyyətə gətirməli olduqlarına diqqət çəkən Pistorius, "Biz ölkəmizi və müttəfiq tərəfdaşlarımızı müdafiə edirik. Biz bir daha aydın şəkildə bildiririk ki, heç kimin NATO ərazisinə hücum fikri olmamalıdır", - deyib.

Bu arada alman ordusu da əsgər çatışmazlığından əziyyət çəkir. Pistoriusun islahatları açıqlayarkən Almaniyada 2011-ci ildə dayandırılmış məcburi hərbi xidmətin yenidən tətbiqi ilə bağlı təkliflərini də təqdim edəcəyi gözlənilirdi. Lakin Pistorius mümkün modellərlə bağlı araşdırmaların və qiymətləndirmələrin davam etdiyini söyləməklə kifayətlənib.

Son rəsmi məlumatlara görə, orduda əsgər sayı 181 min 811 nəfərə enib. Müdafiə naziri Pistoriusun sözlərinə görə, ordudakı əsgərlərin sayı 2031-ci ilə qədər ən azı 203 min nəfərə çatmalıdır.

İnci