Rusiyada Boris Nadejdin seçkilərdə namizəd kimi qeydə alınmadıqdan sonra Mərkəzi Seçki Komissiyasının (MSK) sənədlərinin formalarına etiraz etmək üçün iki iddia ilə Ali Məhkəməyə (SK) müraciət edib.

Sfera.az xəbər verir ki, bu barədə TASS məlumat yayıb.

Agentliyin məlumatına görə, ilk iki iddia Nadejdinin seçici imzalarının toplanması və imza vərəqələrinin yoxlanılması prosedurunu müəyyən edən sənədlərlə razılaşmaması ilə bağlıdır. Bundan əlavə, fevralın 16-da Nadejdin Ali Məhkəmədə üçüncü iddianı qaldırmağa hazırlaşır - bu iddiada o, Mərkəzi Seçki Komissiyasının onu namizəd kimi qeydə almaqdan imtina etmək qərarına etiraz edəcək.

Eyni zamanda, Nadejdin əvvəllər MSK-nın özünə qarşı heç bir şikayətinin olmadığını bildirib.

Qeyd edək ki, fevralın 8-də Boris Nadejdin qarşıdan gələn prezident seçkilərində namizəd kimi qeydiyyatdan keçmək istəyərkən Mərkəzi Seçki Komissiyasından rəsmi imtina alıb. İmtina Nadejdin tərəfindən toplanan imzalardakı qüsurların icazə verilən 5 faiz həddindən çox yüksək olması ilə əlaqələndirilib.B.Nadejdinin namizədliyi Vətəndaş Təşəbbüsü Partiyasından irəli sürülüb. Hətta Navalnı, Xodorkovski kimi Putinə qarşı olanlar Nadejdini dəstəkləməyə çağırıblar. 

Xatırladaq ki, tarixdə ilk dəfə olaraq Rusiyada prezident seçkiləri üç gün ərzində - 2024-cü il martın 15-dən 17-dək keçiriləcək.

Dörd namizəd qeydiyyat prosedurunu başa vurub: hazırkı dövlət başçısı Vladimir Putin, Rusiya Federasiyası Kommunist Partiyasının nümayəndəsi Nikolay Xaritonov, LDPR lideri Leonid Slutski və “Yeni insanlar”dan parlamentin aşağı palatasının sədr müavini Vladislav Davankov.

Əzizə Zeynal