“Azərbaycan bu görüşə “əlini gücləndirərək” gedir” – Sülh müqaviləsi danışıqlarında yeni mərhələ

“Ola bilsin, dekabrın sonunda Ermənistanın xarici işlər naziri ilə görüşüb sülh müqaviləsi ilə bağlı danışıqlar aparacağıq”.

Bunu Azərbaycanın xarici işlər naziri Ceyhun Bayramov jurnalistlərə açıqlamasında deyib.

O, həmçinin bildirib ki, son iki il ərzində üçtərəfli formatda müxtəlif vaxtlarda görüşlər keçirilib: “Digər formatlarda görüşlərin keçirilməsi istisna deyil. Azərbaycan tərəfi istənilən formatda görüşlərin keçirilməsini hər zaman dəstəkləyir. Müsbət nəticələr olmasa da, açıq mövzuların müzakirəsi müsbət haldır. Ən azından qarşı tərəf üzərinə götürdüyü öhdəliklərlə bağlı vədlərini də yerinə yetirməlidir”.

Mövzu ilə bağlı Sfera.az-a açıqlama verən politoloq Məhəmməd Əsədullazadə deyib ki, nazirlərin bu görüşü digərlərindən fəqrli olacaq:

“Bu görüş Laçın yolunda baş verən proseslər fonunda keçiriləcək və İrəvanın mövqeyində nələrin dəyişəcəyini göstərəcək. Azərbaycan  növbəti danışıqlara əlini kifayət qədər  gücləndirərək qatılır. Ermənistan bir il ərzində aparılan intensiv danışıqlar prosesini pozub. Həm Moskva, həm aktiv olan Brüssel formatı, həm də Vaşinqtonun son vasitəçiliyi nəticəsiz qaldı. Demək olar ki, yola saldığımız ili  itirilmiş il olaraq xarakterizə etmək olar. Halbuki, bu il ərzində sülh müqaviləsi bağlana bilərdi.  Amma, il ərzində bir çox məsələlərə aydınlıq gəldi və Azərbaycan son "yumşaq gücdən" istifadə edərək Qarabağda əsas təzyiq rıçaqlarının əlində olduğunu Ermənistana başa saldı”.

Ekspert qeyd edib ki, xarici işlər nazirlərinin növbəti görüşü Moskvanın vasitəçiliyi ilə deyil, Brüssel formatında keçirilərsə, yeni danışıqlar üçün zəmin yarana bilər:

“Artıq Avropa İttifaqı da Ermənistanın sülh müqaviləsinin yayınmasından və Rusiyanın vasitəçiliyinə üstünlük verməsindən narahatdır. Sülhü və təhlükəsizliyi təhdid edən Rusiyadır. Moskva prosesdə əsas qızışdırıcı faktor olaraq qalır. Moskvanı prosesdən uzaqlaşdırmaq üçün ciddi mexanizmlər işləyib tapmaq lazımdır. Türkiyə faktoru isə ən optimal variantdır. Avropa İttifaqı da bu kontekstdə Ankaranın vasitəçiliyini irəli sürüb. Xarici işlər nazirlərinin görüşündə Türkiyənin vasitəçiliyi danışıqlar predmeti olacaq. Ermənistan Türkiyənin vasitəçiliyinə razı  olarsa, bu, Ankara-İrəvan əlaqələrinin inkişafına zəmin yaradacaq”.

Günay Rəsulqızı