Bu xəstəlik payız-qış aylarında sürətlə YAYILIR - AÇIQLAMA
Payız-qış aylarında artan və yoluxucu olan qaşınma hər yaşda müşahidə edilə bilər. Dəri xəstəliyinin bir növü olan və 15-20 dəqiqə kimi qısa müddətdə yaxın təmasla insandan insana yayılan qaşınma, xüsusilə insanların sıx olduğu mühitlərdə daha sürətli yayılır.
Bəs qaşınmanı yaradan səbəblər nədir və ondan necə qorunmaq lazımdır?
Mövzu ilə bağlı Sfera.az-a danışan dermatoloq Aygün Mustafayeva bildirib ki, dünyada çox rast gəlinən və dəridə qaşınma və səpgilərə səbəb olan bu xəstəlik soyuq havalarda daha geniş yayılır.
“Qotur, Sarcoptes scabiei von hominis gənəsinin yaratdığı bir dəri xəstəliyi kimi tanınır. Gecələr daha sıx qaşınmaya səbəb olan bu xəstəlik müalicə edilmədikdə yara əmələ gəlməsinə səbəb olur. Şəxsi gigiyenadan asılı olmayaraq hər kəsdə qaşınma baş verə bilər. Qotur xəstəliyi ekoloji cəhətdən təmiz olmayan ərazilər və obyektlər vasitəsilə daha tez yayılır. Məktəblərdə və bağçalarda uşaqlar çox sıx təmasda olurlar və idman geyimlərini paylaşırlar. Mağazalardakı paltarlar, o paltarların uzun müddət insanların üzərində qalması, restoranlarda ortaq yerlərin istifadəsi kimi faktorlar xəstəliyin meydana gəlməsinə şərait yaradır. Ən çox görülən simptomu qaşınmadır. Bu qaşınmalar gecələr daha da pisləşir. Daha çox barmaq arası, qoltuqaltı, bel, omba, ayaq və topuq nahiyələrində olur. Qotur ilk yoluxduqda heç bir əlamət olmadan irəliləyir. Dəriyə daxil olduqdan təqribən 45-60 gün sonra simptomları üzə çıxır".
Həkim qeyd edib ki, yoluxmuş şəxslə eyni yataqda yatmaq, qucaqlaşmaq və yoluxmuş şəxsin şəxsi əşyalarını, paltarlarını, dəsmallarını və yataq dəstlərini istifadə etmək kimi hallar yoluxma riskini artırır.
“Qoturun müalicəsi üçün evdə istifadə edilən bəzi təbii üsullar var. Lakin bu üsullar müəyyən çətinliklər yarada bilər. Unutmaq olmaz ki, qoturun müalicəsi yalnız şikayəti olan şəxsin müalicəsi ilə kifayətlənmir. Fərdi olaraq tətbiq edilən və kifayət qədər elmi sübuta malik olmayan üsullar xəstəliyin ağırlaşmasına səbəb ola bilər”.
Ülkər Abdurahmanlı
