“Rəsmi Bakı Rusiyaya nota verə bilər...” - “İsgəndər-M” raketlərilə ilə bağlı tutarlı açıqlama gecikir
13:42 / 08.04.2021
1092
"Şuşaya atılan "İsgəndər-M” raketlərilə bağlı
Moskvadan izahat tələb edə, hətta nota verə bilərik. Amma elə reaksiya göstərməliyik
ki, həm Azərbaycanın maraqları qorunsun,
həm də Rusiya ilə münasibətlərimizdə böyük bir böhran yaratmasın. Azərbaycan cəmiyyəti məsələ ətrafında
narahatlığı və reaksiyasını ortaya qoyub. Düşünürəm ki, rəsmilər də bu
reaksiyanın ortaya çıxmasında maraqlıdır. Məsələn, ANAMA rəsmisinin məsələ ilə bağlı 3 dəfə müxtəlif
kontekstdə açıqlaması olub”.
Bu sözləri Sfera.az-a açıqlamasında Moskvanın
Şuşada qalıqları tapılan "İsgəndər-M” raketlərilə bağlı bitkin cavab vermədiyi
təqdirdə Azərbaycanın hansı addımlar atmalı olduğuna aydınlıq gətirərkən
QAFSAM-ın sədr müavini Nazim Cəfərsoy deyib:
"Rusiya Azərbaycan münasibətləri çoxmiqyaslı,
çoxtərəfli münasibətlər səviyyəsindədir. Qarabağ məsələsi və Rusiya sülhməramlılarının
gəlməsilə bu məsələ daha da həssaslaşıb. Rusiyadan "İsgəndər-M” raketlərilə
bağlı dolğun cavab ala bilməsək, yaranmış vəziyyətdə elə etməliyik ki, Kreml bu
müstəvidə Azərbaycan üçün müəyyən fürsətlər yaratsın”.
Politoloq həmin fürsətlərin nədən ibarət ola
biləcəyinə də aydınlıq gətirib: "Moskvadan açıqlama tələb edə bilərik. Rusiyanın Qarabağ məsələsi ətrafında nisbətən
düzələn imici "İsgəndər”lə bağlı yaranan son proseslə əlaqədar neqativə doğru dəyişir.
Bu fonda Moskvadan həm öz imicini qorumaq, həm də Azərbaycanın da maraqlarına
cavab verəcək addımların atılmasını gündəmə gətirə bilərik. Həmin addımlar
antiterror əməliyyatlarına müəyyən fayda vermək, önümüzdəki dönəmdə sülhməramlıların
azərbaycanlıların Qarabağa qayıdışı ilə bağlı bəzi addımlar atmasını, Azərbaycan
rəsmilərinin Xankəndinə səfərinin təşkili, bu şəhərdə Qarabağın azərbaycanlı
icmasının ofisinin açılması, Laçın koridoru ilə bağlı Bakını daha çox təmin edən
əməkdaşlığın qurulması istiqamətində ola bilər”.
