Rəhman Axundov meşəyə 26 milyonluq zərər vurub
16:41 / 25.09.2019
1562
Rusiyanın Perm vilayətinin Oktyabrski Rayon Məhkəməsində Şuçye-Ozero kəndinin sakini, Azərbaycan vətəndaşı Rəhman Axundovun cinayət işi üzrə məhkəmə prosesi keçirilib.
Sfera.az xəbər verir ki, R. Axundov Rusiya Cinayət Məcəlləsinin 260.3 3-cü maddəsi ilə nəzərdə tutulmuş bir sıra əməlləri törətməkdə ittiham olunur. Belə ki, o, meşə sahələrinin xüsusilə böyük ölçülərdə talanmasında təqsirli bilinir.
Məhkəmə təqsirləndirilən şəxsin 2017-ci ilin yay aylarından 2018-ci ilin qış aylarına qədər qanunsuz yollarla varlanmaq məqsədi ilə Perm ərazisindəki Dövlət xəzinədarlıq müəssisəsi olan "Oktyabr meşəçiliyi” ərazisində mövsümi meşə tədarükü ilə məşğul olduğunu müəyyən edib. Qanunsuz əməllərini həyata keçirən Axundov, iki muzdlu briqada cəlb edərək şam və küknar ağaclarından ibarət 1,2 min kubmetrdən çox qiymətli meşə ağaclarını kəsdirib. Əslində onun ağac kəsmək üçün qanuni icazəsi olmayıb.
Axundov törətdiyi qanunsuz əməlləri ilə meşə fonduna təxminən 26 milyon rubl məbləğində ziyan vurub. Məhkəmə dövlət ittihamçısının mövqeyini nəzərə alaraq, müttəhimi 4 il müddətinə azadlıqdan məhrum edib. O, cəzasını ümumi rejimli cəzaçəkmə müəssisəsində çəkəcək. Məhkəmə habelə dövlətə dəymiş ziyanın ödənilməsi barədə qərar qəbul edib. Maddi ziyanı kompensasiya etmək üçün məhkumun əmlakı - meşə təsərrüfatı texnikası müsadirə edilib. (virtualaz.org)
