"2020-ci ilin yanvarında inflyasiyanın artaraq 2,7 faizə qədər yüksəlməsinə əhalinin gəlirlərinin artması fonunda daha böyük həcmdə pul kütləsinin dövriyyəyə daxil olması səbəb olub”.

Sfera.az-a açıqlamasında bu sözləri 2019-cu ilin yanvarında Azərbaycanda inflyasiyanın 1,7 faiz olması və cari ilin ilk ayında 2,7 faizə yüksəlməsi səbəblərinə toxunarkən Libeqarl İqtisadçılar İctimai Birliyinin sədri Akif Nəsirli deyib:

"Keçən il ərzində Azərbaycanda əhalinin gəlirlərinin artması istiqamətində xeyli işlər görüldü. Orta aylıq əmək haqqı yüksəldilərək 250 manata, minimum əmək pensiyası isə 200 manata çatdırıldı. Bu gəlir mənbələrindən yararlanan əhalinin sayı çox olduğundan baş verən artımlar hesabına böyük həcmdə pul kütləsi maliyyə dövriyyəsinə daxil oldu. Məhz bunun əsasında da xərc inflyasiyasının yaranması müşahidə edildi”.

Müsahibimiz hesab edir ki, belə vəziyyətdə ölkədə mövcud olan inhisarçılıq da inflyasiya səviyyəsinin artmasına təsir edib: "Azərbaycanda inhisarçılıq geniş arealı əhatə edib. Ondan azad olan sahələr çox cüzidir. Ona görə də yaranmış vəziyyətdə əhalinin gəlirlərinin artması birbaşa qiymətlərin bahalaşmasına, o da öz növbəsində inflyasiya səviyyəsinin yüksəlməsinə gətirib çıxarır. Sirr deyil ki, inhisarçılığın hökm sürdüyü ölkədə əhalinin gəlirlərinin artımı monopolist üçün qiymətləri qaldırmaq baxımından bir əsasa çevrilir. Onlar ticarət dövriyyəsi artanda mənfəət əldə etmək üçün mütləq qiymətləri qaldırırlar. Belədə inhisarçılığın olduğu yerlərdə əhalidə müəyyən dərəcədə artan pul kütləsini öz çiblərinə doldurmağa çalışırlar”.

Ekspert inflyasiyanın artımına rəvac verən digər amilləri də sadaladı: "İnflyasiyanın artımına təsir edən digər amil sahibkarların xərcinin artmasından qaynaqlanır. Habelə, bu müddətdə idxal qiymətləri də yüksəlib. Dünya bazarında baş verən qiymət artımı dərhal Azərbaycan bazarına da təsir edir”.

Elçin

Sfera.az