Politoloq: "Ermənistanda  kök atmış rəyi Azərbaycan əsgəri dəyişə bilər və dəyişəcək”

Bir müddət öncə Ermənistandan qayıtmış "Turan” informasiya agentliyinin redaktoru Şahin Hacıyev "BBC News Azərbaycanca”ya müsahibəsində bu ölkəyə səfərindən, orada eşidib-gördüklərindən, Ermənistan cəmiyyətindəki dəyişiklərdən danışıb. 20 il əvvəl İrəvana səfərində müşahidə etdiyi vəziyyətlə indiki durumu müqayisə edən Şahin Hacıyev bildirib ki, 20 il əvvəl erməni cəmiyyətində həyəcan, hansısa gözlənti daha çox idi, indi isə Ermənistandakı böyüyən yeni nəsil hesab edir ki, hər şey artıq müəyyənləşdirilib, məlumdur və olduğu kimi də qalacaq.

Ermənilərin xeyli hissəsinin ölkədən köçdüyünü deyən Ş.Hacıyev qeyd edib ki, əsasən də cavanlar Ermənistanı tərk edib. Konflikt məsələsinə gəldikdə "Qarabağ bizimdir, heç kimə qaytarmayacağıq, mövqeyimiz qətidir” fikri erməni cəmiyyətində aparıcıdır: "Digər bir dəyişikliksə ondan ibarətdir ki, 20 il əvvəl biz sülh yollarını müzakirə edirdiksə, indi ictimaiyyətdə elə bir həvəs yoxdur. Onlar hesab edirlər ki, Ermənistan güzəştə getməyəcək, getməməlidir, hansısa rayonun və ya rayonların qaytarılmasından söhbət gedə bilməz. Ermənilər düşünür ki, bu artıq həll olunmuş məsələdir və Azərbaycan bununla bağlı heç nə edə bilməz, hətta cəhd etsə belə biz geri çəkilən deyilik. Ümumi vəziyyət belədir”.

Bəs Ermənistan cəmiyyətində olan bu mövqe yeni hakimiyyətin Qarabağla bağlı addımlarına necə təsir edəcək? Bu vəziyyətdə yeni hakimiyyətin Qarabağ məsələsində hansısa güzəştli mövqeyə keçmək istəməsi necə nəticələnə bilər? Azərbaycan bu vəziyyəti, erməni cəmiyyətindəki bu əminliyi dəyişmək üçün nə etməlidir?

Politoloq Qabil Hüseynli də bildirdi ki, bugünkü Ermənistan cəmiyyəti Qarabağ məsələsində geri çəkilməmək mövqeyindədir və bunu gizlətmirlər: "Ermənilər uşaqdan böyüyə kimi bu ərazini özlərinin torpaqları hesab edir və bu məsələdə hər hansı güzəştə hazır olmayacaqlarını qəti formada bəyan edirlər. Bu, Ermənistanda millətçiliyin və şovinizmin ən yüksək səviyyədə yayılmasına dəlalət edən faktlardır. Ona görə də danışıqlar prosesində də yeni hakimiyyətin bu məsələdə hər hansı ciddi siyasi manevrə getməsi, güzəşt mövqeyi sərgiləməsi mümkünsüz görünür. Təkcə ona görə yox ki, cəmiyyət Qarabağ məsələsində kompromisə hazır deyil, yeni hakimiyyətin özü də ciddi millətçilik azarına tutulub və əslində xalq necə düşünürsə elə düşünür və Qarabağ məsələsində kompromisə hazır deyil. Ermənistan hakimiyyətinə ABŞ-dan münaqişənin həlli üçün son zamanlar müəyyən təsirlər oldu və onlar bu təsirlərin qarşısında müəyyən yumşalmaya cüzi meyllənsələr də cəmiyyətdə bərqərar olmuş ağır zehiniyyətin təsiri altında yenə də köhnə mövqelərinə qayıtdılar və danışıqlar prosesinə zərbə vurdular.

Bu gün Ermənistan cəmiyyəti bir sıra məsələlər var ki, o məsələlərə tabu qoymuş kimi görünür. O məsələlərin içərisində Dağlıq Qarabağ məsələsində bir addım da olsun geri çəkilməmək birinci yeri tutur. Erməni cəmiyyətində bu məsələlərdə fərqli düşünməyə imkan verilmir. Bunu ictimai şüura yeridiblər. Odur ki, zənnimcə, gələcək danışıqlar prosesində Ermənistan hakimiyyətinin hər hansı kompromis gedəcəyi, erməni cəmiyyətini sülhə hazırlayacağı gözlənilmir. İndiki Ermənistan cəmiyyəti və hakimiyyəti Serj Sərkisyan və Robert Köçəryan rejimindən fərqlənmir. Hətta son vaxtlar daha da radikal mövqeyə keçiblər. Onlarla danışıqlar aparılmasının perspektivi yoxdur".

Politoloq vurğuladı ki, Ermənistan cəmiyyətində kök atmış "Qarabağ məsələsi bitib, bir qarış da torpaq qaytarılmayacaq” rəyini Azərbaycan dəyişə bilər: "Bunun üçün Azərbaycan öz ərazilərinin işğaldan azad edilməsi istiqamətində lazım olan hərbi vəzifələri yerinə yetirməlidir. Ordu sürətlə döyüşə hazırlanmalıdır. Ermənistan cəmiyyəti kimi cəmiyyətləri kompromisə yalnız gücün hesabına gətirmək olar. Erməniləri başqa cür başa salmaq mümkün deyil, Azərbaycan sülh yoluna sadiq qaldıqca erməni cəmiyyətində ”Qarabağ məsələsi bitib" fikri daha da qətiləşir. Ermənistana sübut edilməlidir ki, Qarabağ məsələsi bitməyib, əksinə, Qarabağ məsələsi indi başlayır və bu dəfə onların faciəsi ilə başlayıb bitəcək. Ermənistan cəmiyyətini eyforidan ayıldıb reallığı dərk etdirmənin yeganə yolu Azərbaycanın hərbi əməliyyatlara başlamasıdır"."Yeni Müsavat”