TANAP-ın istifadəyə veriləcəyi tarix DƏQİQLƏŞDİ - Layihənin 93.5 faizi tamamlanıb
Sfera.az Türkiyə mediasına istinadən bildirir ki, bunu TANAP-ın baş direktoru Saltuk Düzyol deyib.
30 iyunda istismara verilir
O, TANAP-ın istifadəyə veriləcəyi tarixi də açıqlayıb:
"30 iyunda klapanı açaraq təbii qaz nəqlini həyata keçirməyi planlaşdırırıq”.
TANAP-ın Cənub Qaz Dəhlizinin ən önəmli hissəsini təşkil etdiyini bildirən S.Düzyol Azərbaycan qazını İtaliyaya qədər aparacaq olan "Trans-Adriatik” (TAP) qaz boru kəməri layihəsinin tamamlanmasından sonra real mənada uğurun əldə ediləcəyini deyib.
S.Düzyol TANAP-la əlaqəli maraqlı statistik rəqəmləri də jurnalistlərin diqqətinə çatdırıb:
"Layihə çərçivəsində 82 milyon saatlıq iş görülüb. 175 milyon kilometr yol qət edilib. 131 min ədəd (hər birinin uzunluğu 13 metr olmaqla) boru birləşdirilib. Qazıntılar zamanı daha öncə elmə məlum olmayan 9 böcək və 1 bitki növünə rast gəlmişik. 154 yerdə arxeoloji tapıntılar aşkarlamışıq”.
Rusiya qazına ehtiyac azalır
S.Düzyol TANAP sayəsində Türkiyənin Rusiya qazından asılılığının azalacağını vurğulayıb:
"Türkiyə Bakı-Tiflis-Ərzurum boru kəməri ilə Azərbaycandan ildə 6,6 milyard kub metr təbii qaz idxal edir. TANAP vasitəsilə Türkiyəyə veriləcək qaz miqdarı 12,6 milyard kub metrə çatacaq. Beləliklə, ölkənin Rusiya qazına ehtiyacı azalacaq”.
TANAP-ın baş direktoru layihəyə gələcəkdə İraqın da qoşula biləcəyini açıqlayıb:
"TANAP hazırda təkcə Azərbaycandan və onun şərqindəki mənbələrdən qaz nəql edilə biləcək şəkildə dizayn edilib. Ancaq hökumətlərin müqavilədə dəyişikliklər etməsi halında Şərqi Aralıq dənizi və İraqdan gələbiləcək təbii qazın da bu boru kəməri vasitəsilə nəql edilməsi mümkündür. Gələcək illərdə bu reallaşa bilər”.
İlknur Salamova
Sfera.az
