Bakıda 23 minlik mağaza 151 minə satıldı
Hərraca çıxarılan mağaza ilkin qiymətinin 6 misli qədər baha qiymətə özəlləşdirilib. 23 min manata təqdim olunan mağaza 151 min manata satılıb.
Əmlak Məsələləri Dövlət Komitəsindən Sfera.az-a verilən məlumata görə, keçirilən hərracda 21 dövlət əmlakı özəlləşdirilib. Özəlləşdirilən müəssisələrdən 1-i səhmdar cəmiyyət, 8-i kiçik dövlət müəssisəsi, 12-i istifadəsiz qeyri-yaşayış sahəsidir.
Hərracda Bakı şəhəri üzrə 4 kiçik dövlət müəssisəsi, 11 istifadəsiz qeyri-yaşayış sahəsi, respublikanın digər şəhər və rayonları üzrə 4 kiçik dövlət müəssisəsi, 1 istifadəsiz qeyri-yaşayış sahəsi sahibini tapıb. Özəlləşdirilən əmlaklar tikinti, ticarət, təmir, sahəsinə aid olub.
Hərracda həmişəki kimi maraqlı hadisələr də yaşanıb. Hərraca çıxarılan 1 kiçik dövlət müəssisəsi və 2 istifadəsiz qeyri-yaşayış sahəsi investorlar arasında rəqabət yaradıb.
Bakının Qaradağ rayonunda yerləşən 60 saylı mağaza hərraca çıxarılan ilkin qiymətinin 6 misli qədər daha yüksək qiymətə özəlləşdirilib. Belə ki, 23 min 500 manata təqdim olunan kiçik dövlət müəssisəsinə 151 min manat ən son qiymət təklif edilib. Həmçinin, paytaxtın Yasamal rayonunda yerləşən ümumi faydalı sahəsi 57,7 kv.m olan istifadəsiz qeyri-yaşayış sahəsinin start qiyməti 100 min manat olsada 162 min manata sahibini tapıb.
Digər rəqabətli şəkildə özəlləşən əmlak Bakının Suraxanı rayonunda yerləşən qeyri-yaşayış sahəsi olub. Ümumi faydalı sahəsi 28,2 kv.m olan istifadəsiz qeyri-yaşayış sahəsinin qiyməti hərracda 3 min 500 manatdan 9 min manatadək artıb.
Həmçinin, Lənkəran şəhərində yerləşən "Lənkəran Broyler” səhmdar cəmiyyətinin 30% səhm paketi 50 min 289 manata özəlləşdirilib.
