Bu məhsul niyə 3 dəfə ucuzlaşdı? - DGK
Ötən gün bir sıra kütləvi informasiya vasitələrində ölkəmizdə pomidorun qiymətinin kəskin ucuzlaşması və buna Azərbaycandan Rusiya Federasiyasına pomidor daşıyan yük nəqliyyat vasitələrinə bu ölkə ərazisində gömrük nəzarətinin sərtləşdirilməsinin-konkret olaraq avtomobillərin daşıdığı yükün çəkisinə hədd qoyulmasının səbəb olduğu bildirilib.
Dövlət Gömrük Komitəsindən Sfera.az-a verilən məlumatda bildirilib ki, hazırda Azərbaycandan Rusiya Federasiyasına pomidor daşıyan yük nəqliyyat vasitələri ilə bağlı yayılan məlumatlar həqiqəti əks etdirmir.
Gömrük sərhədindən keçən avtomobillərin beynəlxalq yükdaşımalara dair norma və qaydalara riayət etmələrinə ciddi nəzarət olunur və buna görə də Rusiya Federasiyasına pomidor aparan avtomobillərim sərhədkeçmə prosesində hər hansı problem yoxdur.
Son 2 gün ərzində şimal sərhədimizdən Rusiya Federasiyasına 85 yük avtomobili və 49 vaqon pomidor məhsulu heç bir maneə olmadan ixrac edilib.
Dövlət Gömrük Komitəsi onu da bildirib ki, iki ölkənin qarşlıqlı gömrük-keçid məntəqələrində yaranan hər hansı problem gömrük xidmətləri rəhbərləri arasında aparılan danışıqlar vasitəsilə operativ şəkildə öz həllini tapır.
Qeyd edək ki, ötən gün mətbuatda pomidorun qiymətinin ucuzlaşmasının səbəbi kimi avtomobillərin daşıdığı yükün çəkisinə gömrükdə hədd qoyulması göstərilsə də, əslində qiymətin ucuzlaşması mövsümlə əlaqəlidir.
