Deputat: “Azərbaycan-Çin arasında vizaların ləğvi iqtisadi baxımdan çox əhəmiyyətlidir”

“Viza rejiminin aradan qaldırılması həm Çindən Azərbaycana gələn, həm də Azərbaycandan Çinə səfər edəcək turistlərin sayının artmasına böyük imkan yaradır”.

Sfera.az xəbər verir ki, bu sözləri İqtisadiyyat.az-a açıqlamasında Milli Məclisin deputatı Göydəniz Qəhrəmanov deyib.

Onun sözlərinə görə, Çinin çox böyük turist bazarı mövcuddur: “Çinlilər dünyanın demək olar bütün ölkələrinə səfər edirlər. Viza rejiminin qarşılıqlı ləğvi Azərbaycan vətəndaşlarının Çinə səfər etməsi imkanlarını daha da asanlaşdıracaq. Çinin turistik, görməli və tarixi yerləri var. Birbaşa uçuşların da mövcud olması bu istiqamət üzrə böyük imkanlar yaradır. Düşünürəm ki, bu addım hər iki ölkə üçün böyük əhəmiyyət daşıyır. Hər iki ölkə rəhbərinin bu məsələyə dəstək olması turizm cameəsi üçün çox yaxşı addım oldu”.

Deputat ikitərəfli vizaların aradan qaldırılmasının iqtisadi baxımından əhəmiyyət kəsb etdiyini vurğulayıb: “Vizaların ləğvi eyni zamanda iqtisadi baxımdan da əhəmiyyət kəsb edən bir addımdır. Azərbaycanda fəaliyyət göstərən iş adamları Çinə çoxlu səfərlər edir, görüşlər keçirirlər. Ümumiyyətlə, Çin də dünya bazarına öz məhsullarını təqdim edir. Azərbaycanlı iş adamlarının bu ölkəyə səfəri, görüşlərin keçirilməsi, ticari nöqteyi-nəzərindən onların işlərini daha da asanlaşdırır. Eyni zamanda Çin iş adamlarının da ölkəmizə səfər etməsi, iqtisadi imkanlarla yaxından tanış olması da əhəmiyyətli dərəcədə imkanlar yaradır”.