ABŞ məhkəməsi Trampın qərarını geri çevirdi
ABŞ Ali Məhkəməsi prezident Donald Tramp administrasiyasının Venesueladan olan mühacirləri “Yad Düşmənlər Qanunu”na əsasən deportasiya etmək planını müvəqqəti olaraq dayandırıb.
Sfera.az “Washington Post”a istinadən xəbər verir ki, Amerika Vətəndaş Azadlıqları Birliyi (ACLU) Ali Məhkəməyə müraciət edərək Tramp administrasiyasının azı 30 venesuelalı mühaciri deportasiya etmək cəhdinə qarşı çıxıb. Məhkəmə isə bu deportasiyanı müvəqqəti şəkildə dayandırmaq qərarına gəlib.
Qərarda 9 Ali Məhkəmə hakimindən yalnız ikisinin bu tələbin əleyhinə olduğu, əksəriyyətin isə ACLU-nun tələbi ilə razılaşdığı bildirilir. Məhkəmənin sərəncamında qeyd olunur: “Hökumət bu Məhkəmənin növbəti qərarına qədər həbsdə olan subyekt qrupunun heç bir üzvünü Birləşmiş Ştatlardan çıxarmamağa tapşırılıb”.
ACLU-nun iddia üzrə baş vəkili Li Gelernt məsələ ilə bağlı verdiyi açıqlamada qərarı alqışlayıb və bunun mühacirlərin hüquqlarının qorunması baxımından vacib addım olduğunu bildirib.
Fidan Hacızadə
