Ağır Cinayətlər Məhkəməsinə yeni bina tikilir - Milyonlarla manata başa gələcək
Bakı Ağır Cinayətlər Məhkəmə Kompleksinin tikintisinə sərf olunacaq vəsaitin həcmi məlum olub.
Sfera.az xəbər verir ki, Ədliyyə Nazirliyi tikinti işləri ilə bağlı bir neçə dəfə tender elan edib.
Belə ki, nazirlik tikinti ilə bağlı ilk satınalma müsabiqəsini 2023-cü ildə elan edib. Tenderin nəticələri 2024-cü ilin dekabrın 29-da dövlət satınalmalarının vahid internet portalında dərc olunub.
Məlumata görə, nazirlik tikinti işlərini "TVM İnşaat" şirkətinə həvalə edib və onunla müqavilə bağlayıb. Müqaviləyə əsasən, Bakı Ağır Cinayətlər Məhkəmə Kompleksinin tikintisi 25 781 428 manata başa gələcək.
"Qafqazinfo"nun bu gün yaydığı məlumata əsasən isə artıq binanın tikintisinə başlanılıb və layihəyə əsasən, bina 2027-ci ilin birinci yarısında tam hazır olaraq istifadəyə verilməlidir.
Qeyd edək ki, Bakı Ağır Cinayətlər Məhkəmə Kompleksinin yeni inzibati binası Sabunçu rayonunun Zabrat qəsəbəsində, 1 saylı Bakı İstintaq Təcridxanasının ("Kürdəxanı" təcridxanası) yaxınlığında istifadəyə veriləcək.
Bakı Ağır Cinayətlər Məhkəməsinin hazırkı inzibati binası paytaxtın Səməd Vurğun küçəsi 30 ünvanında yerləşir.
Məqaləyə dair fotomateriallar:
