"Bəzi güclər Azərbaycanın iradəsini sınağa çəkməyə çalışır"

"Bu gün özünü insan haqları təşkilatları adlandıran çoxsaylı strukturların heç bir reallığa əsaslanmayan hesabatları, çoxsaylı qərəzli media təsisatlarıının yaydığı məlumatlar, o cümlədən  xarici qüvvələrin yerli alətlərinə çevirilən antimilli ünsürlərin  sosial media üzərindən çağırışları açıq formada Azərbaycan hakiminin iradəsinə təsir etməyə, daha kobud desək bu iradəni sındırmağa yönəlib".
 
 

Sfera.az xəbər verir ki, bunu Milli Məclisin bu gün keçirilən plenar iclasında  deputat Bəhruz Məhərrəmov bildirib.

Millət vəkili qeyd edib ki, Bu gün faktiki olaraq Azərbaycan məhkəməsindən bərabərlik hüququndan imtina etmək, siyasi mənsubiyyətinə görə insanlara ayrıcalıq tanımaq, Qərbin marionetlərinə münasibətdə cəzasızlıq mühiti formalaşdırmaq tələb olunur:  

"Biz heç vaxt Qərb təsisatları, xüsusən qərb məhkəmə təsisatları üçün qapılarımızı bağlamamışıq.Azərbaycan Respublikası kifayət qədər qətiyyətlə iradə ifadə edib, amma əvəzində nə görmüşük? İllərlə ərizəçilərin müraciətlərinə “prosedura uyğun formada” ləngidən AİHM siyasi işartı gördüyü bütün işlərə 3-5 gün ərzində baxaraq daha çox məhkəmə kimi yox radikal müxalifət partiyası kimi davranıb. AŞPA özünün ərazi bütövlüyünü bərpa etdiyinə görə Azərbaycanı cəzalandırmaq məqsədi ilə 2024-cü ilin yanvarında bizim nümayəndə heyətimizi səsvermə hüququndan məhrum etdikdən sonra da AİHM eyni ampluada anti- Azərbaycan siyasi mərkəz kimi fəaliyyətini davam edmişdir. Baxmayaraq ki, biz artıq faktiki olaraq qurumdan kənarıq və məhkəmənin formalaşdırılmasında iştirak etmirik. Belə çıxır ki, səs hüququmuz alınır, amma bizi cəzalandırmaq haqqını özlərində saxlamaq istəyirlər. Təbii ki, buna yol verilməməlidir". 

B.Məhərrəmov vurğulayıb ki, bir vaxtlar 1600 faizlik inflyasiya burulğanında olan, enerji resurslarını realizə etməkda aciz qalan ölkə bu gün artıq Avropanın enerji təhlükəsizliyinin qarantoruna çevrilərək şərtlər diqtə edir. 30 il əvvəl kimsə bu cür danışa bilmək imkanımızı təsəvvür etməz olmazdı. Bu, artıq tam azad, müstəqil və suveren davranmağa imkan verən real gücdür.

Firuzə Əliyeva