Çin geri çəkilməyəcəyini bəyan etdi - "Bu, şantajdır"
Çin ABŞ-nin artan tarif təzyiqlərinə qarşı sərt mövqe nümayiş etdirərək, prezident Donald Trampın rəvac olduğu qlobal ticarət müharibəsində geri çəkilməkdən imtina edib.
Sfera.az “Reuters”ə istinadən xəbər verir ki, Pekin bu təzyiqləri “şantaj” adlandıraraq, Vaşinqtonun yeni rüsum hədələrinə qarşı sona qədər mübarizə aparacağını bəyan edib.
Tramp administrasiyasının ötən həftə Çindən idxal olunan məhsullara qarşı qarşılıqlı tarifləri artırmaq qərarına cavab olaraq, ABŞ tərəfi çərşənbə günü bu tarifləri 100%-dən çox artırmaqla hədələmişdi. Bu gedişə cavab olaraq, Çinin Ticarət Nazirliyi ABŞ-ni səhvin üstünə səhv etməkdə və şantaj xarakterini ifşa etməkdə ittiham edib.
Çinin sərt mövqeyi, digər Asiya ölkələrinin və Avropa Birliyinin daha ehtiyatlı yanaşması ilə ziddiyyət təşkil edir. Aİ hazırda üzv dövlətlərlə məsləhətləşərək, istehlakçılara və ixracatçılara daha çox zərər vermədən ABŞ-nin tariflərinə necə cavab veriləcəyini müzakirə edir. Avropa Komissiyasının rəhbəri Ursula von der Leyen və Çinin Baş naziri Li Qiang arasında baş tutan telefon danışığında, danışıqlar yolu ilə həllin vacibliyi vurğulanıb. Tərəflər eyni zamanda, Çin ixracatının ABŞ əvəzinə Avropaya yönləndirilməsi ehtimalı ilə bağlı narahatlıqları müzakirə edib və mümkün ticarət təxribatlarını izləmək üçün mexanizm yaradılması barədə razılığa gəliblər.Bu arada, Çinli istehsalçılar artan tarif təzyiqləri səbəbilə xaricdə yeni zavodlar planlaşdırır, bəzi firmalar isə gəlirlərin azalacağı barədə xəbərdarlıq edib. Xarici risklərin çoxalmasını əsas gətirən Citi bankı, Çin iqtisadiyyatı üçün 2025-ci il üzrə ÜDM artım proqnozunu 4,7%-dən 4,2%-ə endirib.
Avropa Birliyi də öz növbəsində Trampın maliyyə bazarlarında qeyri-sabitlik yaradan və qlobal iqtisadi tənəzzül qorxularını artıran tarif siyasətinə qarşı özünəməxsus əks tədbirlər təklif edir. Qlobal iqtisadi arenada ticarət müharibəsinin təsirləri getdikcə daha geniş miqyas alır.
Fidan Hacızadə
